曼聯多人受傷面對一週雙賽.. 精選

曼聯於聯賽當中作客卡迪夫城2:2賽和，無論球場上既表現到最後一刻失波都令到筆者非常失望，2:2既賽和亦令到莫耶斯於香港網絡成為箭靶，乜野唔夠料、亂換人，喺一段連勝後統統都出晒黎，喺國際賽期間，曼聯球員受傷患困擾，三線必然正選既維迪、卡域克、雲佩斯都缺陣，鍾斯、香川亦因輕傷未能於聯賽上陣 (應該都係留力歐冠)，加上原本受緊傷既拉菲爾，一共6個球員受傷 (未包括長期病患者費查)。面對傷患，曼聯中場中路只有傑斯、卡華利、費蘭尼；面對傷患，曼聯中堅只有伊雲斯、李奧；面對傷患，曼聯右閘只有替工史摩寧，還好前面傷左香川、雲佩斯仲有贊奴沙、朗尼。曼聯中場問題自費格遜以來一直存在，但一直都係以對球隊熟悉程度去掩蓋問題，費sir 曾經講過會留一套好既陣容比下任教練，但正如筆者一直認為費sir 並未能做到，中場問題依然存在、後防青黃不接，兩翼於C朗出走後未有進補，只買入世界級速度既華西及廢物楊格，兩翼人數唔夠質素更加慘不忍睹，費sir 退休前只好將防守型前鋒韋球王頂一頂左翼，可惜莫耶斯得益於費sir 開發球員多功能性，同樣重用韋球王經常後備上陣出任左翼增強防守，好彩係莫耶斯提升贊奴沙上一隊，彌補兩翼量與質。
至於對手卡迪夫城，發生時間唔遠既第2輪主場反勝曼城3:2，球迷亦視弱無堵，主場雖曾敗於殺死車仔既紐卡素同93分鐘被熱刺絕殺，但佢地主場和過被球迷稱讚超前曼聯既愛華頓，贏過英超巴塞，足見卡迪夫城主場絕不能等閒視之。

最重要既一點係：一週雙賽... 曼聯喺歐冠雖則排第1，第4輪完結後曼聯8分、利華7分、Shakhtar 5分，第5輪作客利華和波或輸波都令到曼聯最後一輪歐冠賽事 (主場對Shakhtar) 承受好大既出線壓力...
識睇波既人都知，前鋒幾勁冇波到都係隱形，得中場得天下，進攻由後防做起，曼聯呢副中後場殘陣，以上3點得1點做到，卡華利同費蘭尼既組合未能擦出卡華利同卡域克一半能力，進退失據，卡華利變成盲頭烏蠅搶波，費蘭尼表現進步左但仍未足以代替卡域克，2人企位亦未能為一對中堅提供接應點，亦未能夠連接兩翼，所以曼聯一味喺兩邊做波一味失，贊奴沙過於表現自己不斷突破忽視隊友，失去前幾場既靈氣，曼聯能夠喺半場領先真係好好彩。下半場情況愈來愈差，莫耶斯先以韋球王換走贊奴沙，增強防守及控球能力並冇不妥，落場後表現亦唔算太差，但必定要改善把握能力... 及後傑斯換走缺乏供應既小豆，彌補曼聯呢場波冇左既中場控球能力，筆者認為呢2個調動令曼聯形勢好返，絕對係合格既換人調動，可惜既係曼聯再次衰喺死球上面，繼修咸頓後再次被對手喺尾段扳平，而朗尼及後使出歐偉倫絕技... 未能贏波只能怪球員自己。作客利華既歐冠賽事，鍾斯、香川復出，為曼聯中路帶黎防守及前場連接，傑斯延續近幾場既發揮，繼續為曼聯喺卡域克缺乏下提供快速分邊及控制節奏，整體表現比上場聯賽好得太多，呢場波傑斯成日比人爆，但問題不大，相反防守上幫到手，開波初段李奧傳失傑斯幫手截波，除左截波亦有靚鏟波，綜合進攻表現理應得到合理評價而非盲目聲討點解要出傑斯。5個入波當中有3球係靠死球攻勢取得，反映出曼聯係運動戰當中仲未揾到一套from 去進攻，但第1球值得我地去睇返，香川擺脫防守比後上緊既傑斯，傑斯分比左邊既朗尼，朗尼傳中由華西撞入，成個入波過程一氣呵成，算係今季曼聯比較靚既入波。雖然朗尼對其中4個入波有直接關係，亦冇出現幾腳調整先傳波既 frist touch 問題，但筆者認為冇入波同助攻既香川先係主宰今場比賽既關鍵性人物，無論幾時佢既走位都為隊友提供接應點，兼令到對方球員難以應付，香川喺中路令對卡迪夫城既垃圾表現補左一大部分，令前中後左右都連接起黎，當然傑斯既分邊以及鍾斯既防守都影響住香川，但冇左香川的話，傑斯只能夠分邊一味喺邊路傳中，而非今場波咁左中右都能夠成功製造攻勢。今場波既失敗之處，應該係曼聯防守死球能力，差唔多每次都被利華搶點成功，若果係英超球隊相信唔會0失球吧...