從廢柴、廢蘭尼、廢碧,到如今的廢莫

2005年堅尼於球隊公開批評當時既曼聯小將費查、奧沙等小將以及李奧費迪南後,曼聯於歐聯兵敗里爾,隨隊作客既5000名球迷高呼隊長堅尼名字以支持佢仗義執言講出球迷心底話,而費格遜卻拒絕批評球隊表現找藉口護短﹕「今仗場地質素惡劣,讓我們難以控球在腳,儘管我也認同球隊表現不足以獲勝,但全失3分卻有點不值。球員已盡所能,這班年輕新兵的確缺乏經驗,但他們仍以良好態度作戰,你需要信任陣中的年輕球員,但不能期望他們短時間內脫胎換骨。」,最後以曼聯1勝3和2負成績包尾出局,及後堅尼亦離開曼聯令中場直至今日仍面對防守與硬度唔夠既問題。
後三冠時期,費Sir 為曼聯更新換代進行換血,華朗、迪贊巴、基比臣、比利安、阿倫史密夫、科蘭、侯活、卡路爾、雲達沙、米拿、沙夏、雲佬、朗尼、C朗、朴智星、軒斯先後於 01-05 年之間加盟曼聯,曼聯青訓既奧沙、李察臣、費查、布朗、巴斯利、史柏達亦得到為曼聯上陣既機會,費Sir 既徹底改變令曼聯陷入低潮,整整3年與英超冠軍無緣,曼聯沒落、廢Sir 老矣,怒罵之聲不絕,費查既不濟更被曼迷冠上廢柴之名 (費查喺堅尼出走後負擔起球隊 dirty work 後洗脫廢柴之名),李察臣場上作用亦似如今既楊格,球隊缺少三冠時既霸氣,進攻模式單調,試過輸比榜尾狼隊,面對 special one 既車仔未打先輸氣勢,落後緊既踢法似贏緊波,呢隊曼聯亦算得上係費Sir 手上近年最廢,入波倚重雲佬,朗尼、C朗未成熟,史高斯、傑斯未能成功轉變踢法,後防漏洞百出炸彈常爆 (請回想敵對球迷喜愛既布朗、施維施達、加利佬),龍門喺雲達沙加盟前經常出現蝦碌場面,而曼狗亦逐漸演變為現今流行既獌。
清洗基巴臣、迪贊巴等瘀血,為保C朗而放走頭號射手雲佬,成個夏天只係買左卡域克,喺05年冬季買入既艾夫華同維迪融合球隊後為曼聯提供穩固防線,沙夏、朗尼無私既傳送,C朗既開竅 (準確黎講係不斷加操變成全能球員),3老將既回勇,曼聯重奪英超,從當年既踢法黎睇,曼聯依靠穩定防線以及史高斯、卡域克2舊座地炮提供精準傳送,配合沙夏、C朗、朗尼三人技術速度兼備既特點,以防守反擊以及兩翼傳中不斷取得入球,惟面對死守球隊就發揮唔到反擊威力,費Sir 就引入貝碧托夫作為球隊前場既進攻點,但因為高價買入貝碧托夫、將迪維斯擠去後備,而令球迷期望過高及缺乏耐性,喺加盟當初入球量未如理想,而被球迷冠上Hea碧、廢碧稱號,同時將迪維斯出走推喺貝碧托夫身上、抹殺佢為球隊串連既作用,嘲笑佢只識得入弱隊波;而費Sir 高價收購既蘭尼同安達臣,表現都未如理想,蘭尼既獨食冇腦表現與愛華頓費蘭尼出色表現既對比,蘭尼亦被球迷冠上廢蘭尼稱號,喺近季既出色表現先令球迷拿掉廢的稱號。
直到莫耶斯上任前,被球迷冠上廢XX 既稱號就只有韋碧克,經過幾個月,缺乏耐性既球迷立即冠上廢莫稱號予莫耶斯,原因就係不滿廢莫用人戰術,坦白講筆者亦不滿現今曼聯戰績,但從費Sir 留低既陣容黎睇,其實同球隊上一個換血時期陣容有唔少相同之處,球隊都係依靠2個雲佬既入球能力;亦只有一個具有突破能力既翼鋒,分別係當時既C朗同依家既蘭尼;當年中場中換血失敗先用迪贊巴及基巴臣,後用奧沙、阿倫史密夫試打防中,最後中場都係依靠史高斯,如今則只能依靠機動性低既卡域克,同樣機動性低既費蘭尼未能融入球隊分擔工作、卡華利只係兩者之間既潤滑劑唔能夠獨當一面、安達臣既進步接近係零;李奧費迪南因年老變為當年著名後防炸彈布朗、施維施達,艾華、維迪亦成為老將,只有龍門位置喺迪基亞成長後比到人放心。莫耶斯既戰績雖然未能滿足球迷期望,但從呢幾場當中已經見到比較正常既正選排陣,有少許進步,只有換人及進攻戰術冇發揮出水準,未能從攻或守取得平衡,進攻十分單調。
The banner that shows United fans wanted Ferguson out after just THREE years

「我要感謝曼聯,不僅僅是所有的教練員、醫務人員和球會的工作人員,我要感謝的是所有的曼聯人!你們是我曼聯生涯中最美妙的經歷,我的退休並不意味著結束和離開,我還有繼續觀看曼聯的比賽,和所有人在一起!曾幾何時,我在曼聯也有難過糟糕的時光,但是球會上下從球員到球迷所有人都支持我,現在,你們也要同樣的支持新的教練,同樣,我還要把讚譽之詞送給今天退役的史高斯,他是這家球會最偉大的球員。最後我還要感謝我的家人,謝謝你們一直以來對我的支持。」

打完呢篇之後筆者唔會再呼籲急進球迷比時間莫耶斯,最後一句:冇球迷支持就冇費格遜。

如果喜歡我們的文章,請即分享到︰

留言


請按此登錄後留言。未成為會員? 立即註冊
  • Yujames529 於 05/10/2013 評論 NO. 1

    廢蘭尼唔係費蘭尼咩

  • Yong Yuhan 於 05/10/2013 評論 NO. 2

    原来曼联迷的水准都系今low

快捷鍵:←
快捷鍵:→