《紅魔何價》唔係啩！佢嘅人工竟然差山齊士成 35 倍？

本專欄已新設 Facebook 專頁，不定時上載英超新聞或文章，歡迎追蹤！
https://www.facebook.com/glory2utd/
==============================================
推薦文章：
《後費格遜年代的收購回顧》- 莫耶斯篇 雲高爾篇 摩連奴篇 蘇克斯查篇
《尋找曼聯十大失蹤青訓球員》- 上篇

— 此乃 紅魔革命＠Fanpiece 原創文章，轉載前請列明出處 —
英國《太陽報》早前用咗列表嘅形式去報導曼聯球員嘅人工 （撳呢到睇圖），其中啱啱先同球會續約嘅迪基亞 (David de Gea) 以 37 萬 5 千鎊週薪位居榜首，而呢份「肥約」亦會將呢個西班牙門將留隊到 2023 年。
如果你覺得呢份約貴嘅話，或者睇睇緊貼喺後面嘅阿歷斯山齊士 (Alexis Sánchez) 先，呢個喺兩季前加盟嘅智利翼鋒表現慘不忍睹，雖然呢家外借緊去國際米蘭，但其實曼聯仲畀緊同迪基亞差唔多嘅人工佢，再加埋林林總總嘅 Bonus，話唔定隨時佢先係曼聯最高人工嘅球員。
而喺第三位嘅普巴 (Paul Pogba) 週薪都有成 29 萬鎊，據報道指佢之前要求曼聯提供雙倍人工嘅新合約畀佢，不過就算係皇馬或者祖雲達斯都未必開到呢個價畀佢。

排係後面嘅馬斯亞 (Anthony Martial)、拉舒福特 (Marcus Rashford) 同埋麥佳亞 (Harry Maguire) 都算係曼聯嘅高薪一族，我諗大家對呢幾個球員嘅待遇都應該唔會有好大嘅異議。
值得留意嘅仲有新加盟嘅般奴費蘭迪斯 (Bruno Fernandes)，呢個表現出色嘅中場球員原來都只係拎緊 10 萬鎊週薪，同嚟自中超嘅恩哈路 (Odion Ighalo) 一樣，僅僅可以叫做係球隊嘅中產人士，如果般奴費蘭迪斯可以一直維持到呢個表現嘅話，呢個價錢就真係抵到爛。
同山齊士人工相差 35 倍有多嘅係近季表現出色嘅年輕中場麥湯文尼 (Scott McTominay)，據報只有 1 萬鎊週薪，比同樣係青訓出身嘅杜安沙比 (Axel Tuanzebe) 或者科素文沙 (Timothy Fosu-Mensah) 都仲要低。不過亦有其它報導指佢其實有 3 萬鎊週薪，但係就算係 3 萬鎊，喺球隊入面嚟講都屬於較低嘅水平。雖然麥湯文尼上年先續完約，但係曼聯都好應該再用一份「肥約」嚟好好獎勵下呢個球員。你又有冇覺得邊個球員嘅人工唔符合預期呢？
================================
本專欄已新設 Facebook 專頁，不定時上載英超新聞或文章，歡迎追蹤！
https://www.facebook.com/glory2utd/