《轉會策略》亡羊補牢!曼聯五大「待辦事項」

紅魔革命 於 22/09/2020 發表 收藏文章
本專欄已新設 Facebook 專頁,不定時上載英超新聞或文章,歡迎追蹤!
https://www.facebook.com/glory2utd/

==============================================
推薦文章:
《後費格遜年代的收購回顧》- 莫耶斯篇 雲高爾篇 摩連奴篇 蘇克斯查篇
《尋找曼聯十大失蹤青訓球員》- 上篇 下篇
《拆解英超球隊綽號之謎》- 上篇 下篇
《紅魔右翼五大補強選擇》- 按此
《圖解數據》400 場!迪基亞榮升曼聯史上十大外援之首 - 按此

— 此乃 紅魔革命 @Fanpiece 原創文章,轉載前請列明出處 —
英超列強喺武漢肺炎陰霾之下仍然動作多多,唯獨曼聯依舊按兵不動,事事慢半拍。開咧後首場即刻輸畀水晶宮,唔知會唔會令紅魔管理層響起警號,痛定思痛,把握最後轉會窗機會急起直追呢?

五大「待辦事項」

1. 中場補強 (已完成)
喺阿積士 CEO 雲達沙 (Edwin van der Sar) 推動之下,雲迪碧克 (Donny van de Beek) 成為曼聯暫時唯一一單「順利」嘅收購。不過佢嘅定位上同普巴 (Paul Pogba)、般奴費蘭迪斯 (Bruno Fernandes) 一樣都係偏向進攻型,因此未必可以三個同場上陣。
除咗雲迪碧克之外,曼聯最近亦都有傳想喺祖雲達斯免費簽基迪拉 (Sami Khedira) 翻嚟,不過已經 33 歲嘅基迪拉傷患累累,筆者就唔太睇好啦。
急切度:★★★☆☆

2. 右翼補強
曼聯右路問題講到口臭,陣中嘅丹尼爾占士 (Daniel James) 質素唔夠,格連活特 (Mason Greenwood) 仍然需要時間成長,而右閘雲比沙卡 (Aaron Wan-Bissaka) 亦唔擅於進攻,令右路攻力長期受限。
講咗成世嘅辛祖 (Jadon Sancho) 因為轉會費問題遲遲未能落實加盟,隨著時間一日一日過去,右翼嘅選擇亦都一個一個咁畀人買哂,就連「高爾夫」巴利 (Gareth Bale) 都落實回歸熱刺。究竟主理轉會事務嘅管理層活華特 (Ed Woodward) 係對簽下辛祖太有信心,定係真係冇諗過 Plan B 呢?
急切度:★★★★★

3. 中堅補強
曼聯中堅人腳雖然多,但可以用嘅嚟嚟去去都係得隊長麥佳亞 (Harry Maguire) 同埋連迪路夫 (Victor Lindelof)。拜利 (Eric Bailly) 同洛荷 (Marcos Rojo) 踢一場傷十場,鐘斯 (Phil Jones) 唔講都唔知仲喺到,而史摩寧 (Chris Smalling) 亦都不被重用。
麥佳亞雖然表現未夠穩定,但仍然有能力喺曼聯穩佔一席,而連迪路夫加盟曼聯已經踏入第四季,但仍然都畀唔到大家好大嘅信心,唔夠硬淨嘅佢喺應付衝撞型前鋒上表現相當輸蝕,亦有唔少畀對手睇住嚟砌嘅情況出現。
市場上可靠中堅嘅選擇並唔多,之前傳出蘇斯克查想收購嘅尼敦亞基 (Nathan Ake) 亦都已經加盟同市對手曼城,而傳聞中嘅烏柏美卡奴 (Dayot Upamecano) 同埋柏奧托利斯 (Pau Torres) 亦價值不菲,相信曼聯喺呢個位置補強嘅難度可以話係相當之高。
急切度:★★★☆☆

4. 左閘補強
梳爾 (Luke Shaw) 雖然回復健康狀態,但就連佢自己都講話曼聯需要買人嚟加強陣容,而且後備班頓威廉斯 (Brandon Williams) 經驗尚淺,所以曼聯係左閘位置上有一定嘅補強需要。李斯特城嘅捷維爾 (Ben Chilwell) 落實轉會車路士,而早前盛傳嘅列基朗 (Reguilon) 亦都因為回購條款問題而收購失敗,最新目標就轉咗去波圖嘅泰利斯 (Alex Telles) 身上。
急切度:★★★☆☆

5. 清洗冗員
早前傳出嘅六人清洗名單,結果暫時只係放得走阿歷斯山齊士 (Alexis Sanchez)。到底活華特呢幾個月喺咪全程都 Work From Home 呢?
中堅位置嘅洛荷盛傳會翻去阿根廷學生隊,但仍然都只係聽到樓梯聲,不過即使賣得出亦相信唔會收得翻好多轉會費。而租借到意甲嘅史摩寧表現出色,羅馬有意永久簽佢走,不過亦因為叫價太高嘅原因仍然未傾得掂。首席文員菲爾鐘斯早前傳過莫耶斯 (David Moyes) 想買佢翻韋斯咸,不過最後都係冇咗回事,相信要清走佢嘅難度非常之高。
中前場位置嘅連加特 (Jesse Lingard) 最新傳出摩連奴 (Jose Mourinho)有意買佢翻熱刺,而四不像彭利拿 (Andreas Pereira) 無論喺中場定係翼位嘅出場機會都相當少,食之無味不如早啲放走,補貼買人好過啦。
急切度:★★★★☆

=============================
本專欄已新設 Facebook 專頁,不定時上載英超新聞或文章,歡迎追蹤!
https://www.facebook.com/glory2utd/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→