《最後直路》前四爭奪戰!邊隊可以笑到最後?

紅魔革命 於 10/07/2020 發表 收藏文章
本專欄已新設 Facebook 專頁,不定時上載英超新聞或文章,歡迎追蹤!
https://www.facebook.com/glory2utd/

==============================================
推薦文章:
《後費格遜年代的收購回顧》- 莫耶斯篇 雲高爾篇 摩連奴篇 蘇克斯查篇
《尋找曼聯十大失蹤青訓球員》- 上篇 下篇
《拆解英超球隊綽號之謎》- 上篇 下篇

— 此乃 紅魔革命@Fanpiece 原創文章,轉載前請列明出處 —
2019/20 嘅英超球季終於好唔容易咁去到尾聲,而冠軍亦都篤定由利物浦攞到,所以焦點一早就已經落咗喺前四嘅爭奪戰上面。
去到最後大直路,雖然曼城今季輸咗畀利物浦拎唔到冠軍,但係相信喺領先九分之下都應該可以穩奪第二位。而最後兩個名額就由分數相當近磅嘅車路士、李斯特城同埋曼聯去爭,雖然緊貼喺後面嘅狼隊、阿仙奴、熱刺、甚至係般尼,係數字上都仍然有機會搶佔頭四,不過相信機會都相當渺茫。
車路士有一分優勢、李斯特城有得失球差優勢、而曼聯嚟緊嘅對手比較上容易應付,到底最後呢三隊入面,有邊隊要轉戰歐霸,又有邊兩隊可以笑到最後呢?我哋一齊去睇睇呢三隊嚟緊嘅賽程。
【車路士 Chelsea】
車路士嚟緊四場比賽入面除咗主場對諾域治之外,其餘三場都可以算係硬仗。

作客 錫菲聯
雖然錫菲聯屬於升班馬,但係今季表現相當出色,失球數字更加係聯賽三甲咁低,所以車路士今場都唔能夠話係食硬三分。
主場 諾域治
同樣係升班馬,不過呢支就排緊係榜尾,要護級就得返數字上嘅可能,而且表現亦唔見到有咩反彈,車路士領隊林柏特 (Frank Lampard) 應該會寄望可以喺佢地身上輕鬆地全取三分。
作客 利物浦
要喺晏菲路球場贏波並唔係一件容易嘅事,可幸嘅係呢場對紅軍嚟講只係風流波,未必會同你搏老命。不過其實踢呢場波前三日,車路士先同曼聯喺足總杯四強入面對踫完,咁密集嘅賽程亦都可能影響球員表現。
主場 狼隊
煞科戰亦都唔係易踢,雖然狼隊近幾場賽事表現有所回落,但係都不失為一隊有實力嘅球隊,如果車路士要係狼隊身上全取三分,相信全隊上下都要畀盡力先得喇。
【李斯特城 Leicester City】
李斯特城嚟緊嘅賽程唔見得好過車路士好多,除咗般尼茅夫之外,其餘三隊都幾惡頂。

作客 般尼茅夫
般尼茅夫近況表現差勁,但係始終都爭緊護級,爭勝動力不容置疑,不過李斯特城實力始終更勝一籌,係比較上容易全取三分嘅比賽。
主場 錫菲聯
上面已經講過錫菲聯呢隊波唔係咁容易對付,相信李斯特城要過到呢關相當有難度,假如喺呢場失分嘅話會大大不利爭四形勢。
作客 熱刺
雖然由摩連奴帶領嘅熱刺今季成績麻麻,但始終同李斯特城都可以算係叫做實力相當,個人認為比起錫菲聯更加難踢,更容易失分。
主場 曼聯
煞科戰主直情係今季最後嘅高潮,相信呢場比賽可以算係決定頭四誰屬嘅生死對決。兩隊都同樣有爭勝心,不過李斯特城近況明顯轉弱,希望領隊羅渣士 (Brendan Rodgers) 係最後幾場賽事可以扭轉乾坤,為球迷帶嚟一場高手對決喇。
【曼聯 Manchester United】
雖然呢家曼聯排緊喺第五位,但係嚟緊嘅賽程可以講話係相對上比車路士同埋李斯特城容易,除咗李斯特城之外,其餘三場都係對一啲實力較低嘅球隊。不過波係圓嘅,牌面上贏亦唔代表乜嘢,曼聯近季亦有唔少自己攞嚟柒嘅傳統,可能正如蘇斯克查 (Ole Gunnar Solskjær) 所講,要爭頭四就真係要自己爭氣喇。

主場 修咸頓、作客 水晶宮
呢兩隊都已經脫離咗降班區域,算係無欲無求,亦唔算係強隊殺手,如果曼聯想爭前四嘅話就要好好把握,由其係近況咁順,必須爭取全取三分。
主場 韋斯咸
雖然韋斯咸呢家喺榜尾位置,但係鎚仔幫要爭護級亦都唔係咁易食,隨時可能好似車路士早幾場咁啃親,不過球員質素同埋狀態始終有差別,相信蘇斯克查都唔會希望係呢場比賽入面失分。
作客 李斯特城
曼聯因為足總杯賽程嘅關係,最後煞科戰會比李斯特城少咗四日時間休息,緊密嘅賽程可能亦會影響球員表現。正如上面咁講,呢場好大機會係生死決戰,相信賽前嘅積分排位對兩隊喺戰術上同埋攻守傾向上都有好大嘅影響同變數。
--------------------------------------------------
與其旨意人哋失分,不如踢好自己爭取最多嘅分數,呢場頭四之爭好大機會都要踢到煞科戰先知道最後結果,特別係李斯特城對曼聯呢場比賽對最終排名嘅影響極大,甚至可能要以得失球差嚟分勝負。
相信兩隊都會將呢場比賽當係決賽咁踢,希望兩隊喺煞科戰之前都能夠保住爭四希望,嚟一場勝者為王,敗者為寇嘅比賽喇!

=============================
本專欄已新設 Facebook 專頁,不定時上載英超新聞或文章,歡迎追蹤!
https://www.facebook.com/glory2utd/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→