《最後拼圖》紅魔右翼五大補強選擇

紅魔革命 於 02/07/2020 發表 收藏文章
本專欄已新設 Facebook 專頁,不定時上載英超新聞或文章,歡迎追蹤!
https://www.facebook.com/glory2utd/

==============================================
推薦文章:
《後費格遜年代的收購回顧》- 莫耶斯篇 雲高爾篇 摩連奴篇 蘇克斯查篇
《尋找曼聯十大失蹤青訓球員》- 上篇 下篇
《拆解英超球隊綽號之謎》- 上篇 下篇

— 此乃 紅魔革命@Fanpiece 原創文章,轉載前請列明出處 —
曼聯右路攻力疲弱,偏重左路進攻已經唔係第一日嘅事,雖然季初已經收購咗可以踢右翼嘅丹尼爾占士 (Daniel James),但係呢個球員始終質素有限,暫時都未可以擔大旗。
而客串嘅馬達 (Juan Mata) 或者連加特 (Jesse Lingard) 都唔鐘意拉邊,往往都會自動移返入中路搵食,搞到好依賴右閘雲比沙卡 (Aaron Wan-Bissaka) 後上參與進攻,不過呢個右閘守強過攻,所以右翼位置就順理成章成為曼聯最迫切嘅收購目標喇。
接落嚟就等我哋嚟睇睇蘇斯克查 (Ole Gunnar Solskjaer) 喺市場上到底有咩選擇呢?

  1. Jadon Sancho 辛祖
相信大家都唔會對呢個名感到陌生,踢緊德甲多蒙特嘅辛祖同大多數英格蘭球員一樣,喺英超球會嘅青訓系統出身,曾經加入屈福特同埋曼城嘅青年軍。佢喺 2017 年就比多蒙特睇中,用咗大約 800 萬鎊簽佢過去,而家已經係最高身價嘅年輕球員之一。
辛祖今季喺德甲總共上陣咗 32 場,有 17 個入球同埋 16 次助攻,而家仲係 20 歲嘅佢擁有出色嘅盤扭技術同埋創造能力,正正就係曼聯右路所缺少嘅元素。不過英格蘭籍嘅辛祖身價高昂,而且曼聯下季未必攞到歐聯資格亦都係收購嘅一大障礙。

  1. Adama Traore 艾達馬查奧爾
而家效力緊英超狼隊嘅查奧爾出身喺巴塞青訓,之後踢過阿士東維拉同埋米杜士堡,喺英格蘭打滾多年,有一定嘅經驗。
以速度同埋健壯體格見稱嘅查奧爾喺英超表現出色,過人次數亦保持喺聯賽首列,由擅攻嘅佢喺右邊路配搭擅守嘅雲比沙卡可能會有估唔到嘅化學作用。

  1. Leon Bailey 里安拜利
22 歲嘅里安拜利喺比利時球隊亨克出道,2017 年冬季轉會窗就畀以利華古遜出價 2000 萬歐元嘅價錢買咗返去德甲,之後三季以嚟都係球隊的雙翼位置嘅主力。雖然里安拜利係利華古遜主要都係踢左翼多,但係佢自己就係 2018 年嘅一個訪問入面講過其實佢最佳嘅位置係右翼。
利華古遜今季已經確定以第五名完成德甲聯賽,亦即係下季只可以轉戰歐霸,如果曼聯可以拎到歐聯入場券嘅話,可能會係吸引里安拜利加盟嘅一大誘因。

  1. Federico Chiesa 基艾沙
22 歲嘅基艾沙係費倫天拿嘅青訓球員,早喺 16/17 球季就已經憑住佢嘅突破能力同埋個人技術成功上位。意大利籍嘅基艾沙可以勝任好多個進攻位置,除咗右翼鋒位置之外,佢都間唔時畀教練安排喺左邊路、正前鋒或者影子前鋒嘅位置出現。

  1. Ferran Torres 費蘭托利斯
費蘭托利斯喺華倫西亞嘅青訓系統出身,2017 年 11 月就已經首次代表一隊上陣。20 歲嘅費蘭托利斯擅長用佢嘅速度同埋盤扭技術嚟突破對手,係一個好典型嘅右翼隊員,而擁有 6 尺身高嘅佢亦有唔錯嘅制空力。
雖然佢同華倫西亞嘅合約有一條成 8000 萬鎊嘅解約條款,不過因為份約喺 2021 年夏季就會到期,如果華倫西亞短期內冇辦法同佢續約嘅話可能就會選擇以一個合理嘅價錢將佢出售。

--------------------------------------------------
由於武漢肺炎疫情影響,相信各大球員嘅轉會預算都會有所減少,而除咗轉會費影響之外,曼聯下季有冇歐聯資格亦都成為影響收唔收購到心水目標嘅因素之一,希望蘇斯克查可以成功攞到呢張入場券,再係轉會市場搵到佢重建曼聯嘅最後一塊拼圖喇。

=============================
本專欄已新設 Facebook 專頁,不定時上載英超新聞或文章,歡迎追蹤!
https://www.facebook.com/glory2utd/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→