《尋人啟事》曼聯十大失蹤青訓球員(下)

紅魔革命 於 23/06/2020 發表 收藏文章
本專欄已新設 Facebook 專頁,不定時上載英超新聞或文章,歡迎追蹤!
https://www.facebook.com/glory2utd/

==============================================
推薦文章:
《後費格遜年代的收購回顧》- 莫耶斯篇 雲高爾篇 摩連奴篇 蘇斯克查篇

— 此乃 紅魔革命@Fanpiece 原創文章,轉載前請列明出處 —
前文連結請按: 上篇

上回為大家追蹤咗 5 位已經離開曼聯嘅青訓球員,有從來都未發光發熱過嘅天才摩利臣 (Ravel Morrison)、離隊之後順利上位嘅米高堅尼 (Michael Keane),亦有離隊之後喺低級別聯賽浮浮沉沉嘅費耶斯 (Zeki Fryers)、韋爾堅尼 (Will Keane)、禾頓 (Scott Wootton)。
我哋嘅目光多數都只會注視著果啲發光發熱嘅球星,但係除咗呢班球星之外,同時亦都有唔少人喺球壇入面掙扎求存。
接落嚟筆者就會送上其餘五個喺 2010 年之後曾經為曼聯上陣過,但係已經離隊嘅青訓球員,問一聲「你最近還好嗎?」。

Adnan Januzaj 贊奴沙
2013 年首次上陣
總共上陣 63 場

相信大家都非常熟悉贊奴沙呢個名,呢個比利時翼鋒曾經俾眾多嘅球迷視佢為新希望。佢喺 2013/14 季前熱身賽表現出色,之後喺社區盾嘅比賽入面正式首次亮相,不過只係後備上陣咗 7 分鐘。但係好戲在後頭,贊奴沙首次喺英超聯賽正選上陣嘅表現非常搶鏡,包辦哂兩個入球幫球隊 2:1 險勝新特蘭。
雖然有個出色嘅開局,但係贊奴沙之後表現並唔能夠符合球迷同埋領隊嘅期望。以一個年輕球員嚟講,贊奴沙係曼聯一隊得到嘅機會已經算係唔少,但係 3 年入面始終冇辦法突圍而出,甚至睇唔到有進步過。
2015 年曼聯決定外借贊奴沙去德甲多蒙特,但係都得唔到好多機會,甚至要提早結束租約返曼聯。之後贊奴沙再被借去新特蘭,跟隨佢嘅伯樂莫耶斯 (David Moyes),點知表現亦都係麻麻,最終喺 2017 年永久轉會加盟西甲皇家蘇斯達。而家贊奴沙喺皇家蘇斯達效力緊第三季,除咗間唔中有啲傷患之外,都總算係球隊嘅常規球員,表現穩定。

James Wilson 占士威爾遜
2014 年首次上陣
總共上陣 20 場

2014 年時任代管領隊傑斯 (Ryan Giggs) 決定畀機會呢個表現出眾嘅青年軍前鋒,喺英超賽場正選上陣對決侯城,而占士威爾遜亦都不負所托喺呢場比賽拎到兩個入球。不過佢嘅出色表現就好似煙花咁樣一瞬即逝,喺接落黎嘅賽季入面上陣19 場只係收獲到兩個入球。
占士威爾遜隨後喺曼聯嘅日子除咗傷患之外就係被外借,最後喺 2019 年終於被放棄,免費轉會去蘇超鴨巴甸,而家就效力緊 Class of 92' 有份投資嘅英乙球會沙福特城。
Tyler Blackett 布力基
2014 年首次上陣
總共上陣 12 場

雲高爾 (Louis van Gaal) 喺 2014/15 球季接任曼聯領隊初期轉打三中堅陣容,開季頭幾場比賽布力基都得到雲高爾嘅提拔而且多次正選上陣,可惜除咗佢自己表現遜色,就連成隊球隊嘅整體成績都唔掂。
接落嚟布力基就俾隊中其它中堅踢返落後備席甚至係預備組,第二季又被借去蘇超些路迪,2016 年更加俾球隊出售,加盟英冠雷丁。不過布力基喺雷丁表現穩定,到目前為止已經為雷丁上陣咗接近 120 場比賽。

Paddy McNair 麥拿亞
2014 年首次上陣
總共上陣 27 場

麥拿亞係另外一位受到雲高厭提拔嘅青訓球員,並且喺 2014 年聯賽賽事入面得到首次嘅上陣機會。麥拿亞喺雲高爾麾下多數出任中堅或者右閘位置,而佢斷斷續續喺曼聯上陣咗兩季,不過表現唔算穩定。
去到 2016 年就俾摩連奴 (José Mourinho) 賣咗去新特蘭,喺「黑貓」效力兩季之後轉投而家嘅球隊米杜士堡。

Josh Harrop 夏洛普
2017 年首次上陣
總共上陣 1 場

雖然夏洛普只係代表曼聯一隊上陣過一場咁大把,但係或者你都會記得佢喺呢場比賽入面嘅入波同埋慶祝動作,呢一球亦都令佢成為咗英超入面第 100 個入波嘅曼聯球員。
不過夏洛普喺呢場比賽之後就拒絕咗曼聯開出嘅新合約,決定離隊加盟英冠球隊普雷斯頓。夏洛普事後解釋咁係因為佢覺得自己已經到咗需要踢一隊賽事嘅年齡,而曼聯冇辦法提供到足夠嘅上陣機會比佢,所以先決定離隊證明自己嘅能力。
---------------------------------------------------
曼聯近年嘅青訓產品又點只呢十個,被淘汰被淹沒嘅有如恆河星數。而新一代冒起嘅格連活特 (Mason Greenwood)、高美斯 (Angel Gomes),鐘達希 (Tahith Chong) 同埋班頓威廉斯 (Brandon Williams),甚至再新一代嘅占士格納 (James Garner)、迪倫列維特 (Dylan Levitt),你又睇好邊個?
=============================
本專欄已新設 Facebook 專頁,不定時上載英超新聞或文章,歡迎追蹤!
https://www.facebook.com/glory2utd/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→