《尋人啟事》曼聯十大失蹤青訓球員(上)

紅魔革命 於 19/06/2020 發表 收藏文章
本專欄已新設 Facebook 專頁,不定時上載英超新聞或文章,歡迎追蹤!
https://www.facebook.com/glory2utd/

==============================================
推薦文章:
《後費格遜年代的收購回顧》- 莫耶斯篇 雲高爾篇 摩連奴篇 蘇斯克查篇

— 此乃 紅魔革命@Fanpiece 原創文章,轉載前請列明出處 —
由連加特 (Jesse Lingard) 、彭利拿 (Andreas Pereira),到拉舒福特 (Marcus Rashford) 、麥湯文尼 (Scott McTominay),再到格連活特 (Mason Greenwood) 、班頓威廉斯 (Brandon Williams),近年有唔少曼聯青訓球員順利上位成為咗一隊成員。但係就算係普巴 (Paul Pogba),當初都唔能夠喺費爵爺手上得到上陣機會,繼而出走去祖雲達斯之後先有機會證明到自己嘅實力。
正所謂一丈功成萬骨枯,要知道青訓球員能夠喺紅魔成功生存並唔係一件容易嘅事,咁多年嚟有唔少嘅青訓球員曇花一現,甚至冇現就已經俾球隊放棄,成為過客。
《尋找曼聯十大失蹤青訓球員》系列將會為大家盤點十個喺 2010 年後曾經為曼聯上陣過,但係已經離隊嘅青訓球員,到底佢地去哂邊?

Ravel Morrison 摩利臣
2010 年首次上陣
總共上陣 3 場

摩利臣喺青訓時代同普巴、連加特同期,亦曾經俾費格遜 (Alex Ferguson) 稱佢做「最有天賦嘅年輕球員」(The best kid you will ever see),甚至指佢比朗尼 (Wayne Rooney) 同埋傑斯 (Ryan Giggs) 年輕嘅時候更加出色。但係就連連加特都已經叫做係英格蘭國腳嘅時候,呢個受到各種不良行為影響嘅天才而家只可以喺錫菲聯坐冷板凳。
摩利臣總共只係喺曼聯上陣過 3 場杯賽,然後就俾費格遜放棄咗,轉會韋斯咸之後亦都唔能夠站穩陣腳,多次畀租借離隊。隨後轉會到意甲拉素,但又畀人外借去墨西哥同瑞典。2019/20 球季轉會番嚟英超球會錫菲聯,但轉個頭季中就被外借到英冠米杜士堡。睇嚟每間收編摩利臣入隊嘅球隊都冇辦法將呢隻野馬馴服,買完先知「中伏」,唯有急急腳將佢送走。
並唔係每個天才都可以發光發亮,對住而家只係 27 歲嘅摩利臣,我哋可能只能夠感嘆一句:「喂天才,為何我們卻是無後半?」

Zeki Fryers 費耶斯
2011 年首次上陣
總共上陣 6 場

費耶斯 2009 年加盟曼聯青年軍,但係呢位司職左閘或者中堅嘅球員受到嚴重嘅膝傷困擾,直到 2011 年先首次代表一隊嘅英格蘭聯賽盃上陣。
由於缺少機會,費耶斯最後就俾曼聯出售去到比利時球隊標準列治,之後輾轉又返到英超加盟熱刺同水晶宮但未被重用,即使降級去到英冠球隊都冇辦法好好發揮,最後現年 27 歲嘅費耶斯終於喺英甲球隊史雲頓搵到自己嘅位置,算係可以穩定咁上陣。

Michael Keane 米高堅尼
2011 年首次上陣
總共上陣 5 場

相信有睇開英超嘅球迷都唔會對米高堅尼陌生,現時效力愛華頓嘅英格蘭中堅亦係曼聯嘅青訓出品。米高堅尼喺 2011 年獲得機會,喺聯賽杯比賽入面上陣亮相,但係之後多次遭到外借,一共只係為曼聯上陣左 5 場。
米高堅尼最後喺 2015 年轉會加盟般尼,喺般尼嘅出色表現令佢獲得愛華頓關注繼而決定將佢收購。至今米高堅尼已經為般尼同愛華頓喺英超賽事上陣超過 140 場,同埋為英格蘭國家隊上陣 10 場。

Will Keane 韋爾堅尼
2011 年首次上陣
總共上陣 3 場

韋爾堅尼係米高堅尼嘅雙胞胎兄弟,司職前鋒,同樣喺 2011 年首次登場,但隨後卻受到嚴重十字韌帶傷患。
接落嚟年復一年咁被外借,韋爾堅尼喺曼聯獲得嘅機會比米高堅尼更少,6 年間只係為一隊上陣左 3 場,其後轉會到升班馬侯城。喺侯城效力3年後免費轉會到葉士域治,而家喺英甲聯賽力爭升班。
Scott Wootton 禾頓
2012 年首次上陣
總共上陣 4 場

司職中堅嘅禾頓喺 2007 年離開利物浦青訓系統轉嚟曼聯嘅青年軍,雖然早就喺 2011 年名宿加利尼維利 (Gary Neville) 嘅告別賽入面喺一隊亮相,但係正式比賽就要等到 2012 年 9 月嘅聯賽杯賽事先得到第一次上陣機會。
同普遍嘅青訓球員一樣,禾頓一直都俾曼聯外借到唔同嘅英冠、英甲嘅球隊去吸收經驗同埋考驗佢嘅質素。總共代表曼聯一隊上陣 4 場,始終都得唔到領隊嘅信任下唯有離隊,轉投另一隊死敵列斯聯。現年 28 歲嘅禾頓效力緊英乙球隊普利茅夫,睇嚟餘下嘅職業生涯都好大機會會繼續喺低級別聯賽入面打滾。

—下集待續—

================================
本專欄已新設 Facebook 專頁,不定時上載英超新聞或文章,歡迎追蹤!
https://www.facebook.com/glory2utd/


如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • 球場會計佬
    球場會計佬 於 19/06/2020 評論 NO. 1

    Zeki Fryers 當年唔係被曼聯放棄,而係熱刺出蠱惑撬走,可以參考https://s.fanpiece.com/pQOmxRB

快捷鍵:←
快捷鍵:→