《圖解數據》400 場!迪基亞榮升曼聯史上十大外援之首

紅魔革命 於 16/07/2020 發表 收藏文章
本專欄已新設 Facebook 專頁,不定時上載英超新聞或文章,歡迎追蹤!
https://www.facebook.com/glory2utd/

==============================================
推薦文章:
《後費格遜年代的收購回顧》- 莫耶斯篇 雲高爾篇 摩連奴篇 蘇克斯查篇
《尋找曼聯十大失蹤青訓球員》- 上篇 下篇
《拆解英超球隊綽號之謎》- 上篇 下篇
《紅魔右翼五大補強選擇》- 按此

— 此乃 紅魔革命 @Fanpiece 原創文章,轉載前請列明出處 —
光陰似箭,轉眼間迪基亞 (David de Gea) 嚟緊就會喺曼聯踏入第十年。好多球迷都曾經打定輸數以為佢會離隊加盟皇馬,但直到而家佢都仍然係曼聯嘅一號正選門將。
迪基亞最近更加超越前輩舒米高 (Peter Schmeichel) 成為上陣最多嘅海外球員 (英國、愛爾蘭以外),亦都達到 400 場嘅里程碑。我哋一齊睇睇曼聯史上十大外援嘅排行,回顧一下佢哋對球隊嘅貢獻喇。
第十位:Juan Mata 馬達
除咗迪基亞之外,馬達係呢個排行榜入面唯一仍然效力緊嘅球員。佢喺 2014 年冬季由車路士轉會過嚟曼聯,亦係「後費格遜時代」早期嘅收購之一。

第九位:Edwin van der Sar 雲達沙
自舒米高喺 1999 年離隊之後,曼聯一直都搵唔到一個信得過嘅門將。直至去到 2005 年,費格遜 (Alex Ferguson) 先至搵到雲達沙填補呢個位置。雖然佢加盟曼聯嘅時候已經 34 歲,但都阻唔到佢協助曼聯再創高峯。
雲達沙喺超過一半嘅上陣賽事入面都能夠保持清白之身,亦都曾經喺 2008-09 球季創下 1,311 分鐘不失球記錄,而喺歐聯決賽撲出安歷卡 (Nicolas Anelka) 嘅十二碼更加令人難以忘記。

第八位:Cristiano Ronaldo C朗拿度
英超冠軍、足總杯、聯賽杯、歐聯冠軍,以至佢第一個嘅金球獎,C朗拿度喺曼聯六年間為球隊贏盡各項賽事嘅冠軍。
除咗上陣次數之外,佢亦都係繼雲尼斯達萊 (Ruud van Nistelrooy) 同埋蘇斯克查 (Ole Gunnar Solskjaer) 之後,入波次數排名第三嘅曼聯海外球員。

第七位:Nemanja Vidic 維迪
鐵血隊長維迪同里奧費迪南 (Rio Ferdinand) 嘅中堅組合實在令人懷念,如果唔係受傷患困擾,相信呢位塞爾維亞中堅或者可以進佔排行榜更前嘅位置。
除此之外,維迪亦都係繼簡東拿 (Eric Cantona) 之後,第二位為曼聯捧起英超冠軍獎盃嘅海外球員。

第六位:Antonio Valencia 華倫西亞
費格遜喺 2009 年由韋根簽咗右翼華倫西亞返嚟,佢喺效力曼聯十年間曾經轉著傳奇七號波衫、經歷斷腳傷患、轉打右閘位置,同埋擔任球隊隊長。
相信大部分球迷都會肯定華倫西亞對球隊嘅貢獻,係個行事低調嘅無名英雄。

第五位:Mikael Silvestre 施維施達
雖然當年經常畀球迷戲稱佢係「炸彈」或者「豬達」,但係其實施維施達一直都係球隊中嘅重要成員。後期雖然佢唔夠同位置嘅軒斯 (Gabriel Heinze) 同埋艾夫拿 (Patrice Evra) 爭正選,不過仍然得到阿仙奴領隊雲加 (Arsène Wenger) 垂青,離隊加盟兵工廠。

第四位:Ole Gunnar Solskjaer 蘇斯克查
現任領隊蘇斯克查排喺第四,不過其實佢係曼聯效力最耐嘅海外球員 。當中有好幾年蘇斯克查都深受嚴重嘅傷患困擾,如果唔係嘅話相信迪基亞都應該冇咁快可以登上第一位喇。

第三位:Patrice Evra 艾夫拿
相信大部分球迷都同意艾夫拿係曼聯史上最佳左閘之一,喺左路走上走落,且攻且守嘅佢亦曾經以隊長身份為曼聯捧起聯賽杯錦標。

第二位:Peter Schmeichel 舒米高
1991 年加盟曼聯嘅舒米高一直都畀球迷認為佢係球隊史上最佳嘅門將,而佢自 1999 年離隊以嚟一直都係曼聯上陣次數最多嘅海外球員,不過呢個記錄近日已經畀現任門將迪基亞打破。

第一位:David De Gea 迪基亞
費格遜喺 2011 年以高價簽迪基亞返嚟代替退休嘅雲達沙,雖然早期表現反覆,不過適應過後總算可以話係成功無縫接棒。
拎過四次曼聯年度最佳球員獎,亦入選過五次 PFA 年度最佳陣容嘅迪基亞雖然喺錦標同埋數據上都明顯不及舒米高,不過以整支球隊嘅水平去睇,直接比較又未免對迪基亞唔係太公平。
29 歲對門將嚟講仍然算係後生,希望迪基亞可以把握嚟緊嘅時間同機會,挑戰更多嘅冠軍同埋記錄喇。

=============================
本專欄已新設 Facebook 專頁,不定時上載英超新聞或文章,歡迎追蹤!
https://www.facebook.com/glory2utd/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→