《上位之路》麥湯文尼續約至 2025 年,曼聯未來隊長人選?

紅魔革命 於 24/06/2020 發表 收藏文章
本專欄已新設 Facebook 專頁,不定時上載英超新聞或文章,歡迎追蹤!
https://www.facebook.com/glory2utd/

==============================================
推薦文章:
《後費格遜年代的收購回顧》- 莫耶斯篇 雲高爾篇 摩連奴篇 蘇克斯查篇
《尋找曼聯十大失蹤青訓球員》- 上篇 下篇

— 此乃 紅魔革命@Fanpiece 原創文章,轉載前請列明出處 —
筆者日前出咗一篇文講話麥湯文尼 (Scott McTominay) 嘅薪酬竟然少過山齊士成 35 倍咁多 (撳嚟睇),唔知蘇斯克查 (Ole Gunnar Solskjaer) 係咪識睇中文呢,睇完尋日就拿拿聲同呢個青訓出身嘅中場球員續咗份新約,將佢留係奧脫福至 2025 年,仲可以選擇延長多一年添。
雖然唔知麥湯文尼今次加咗幾多人工,但係相信曼聯都唔會虧待呢個表現出色嘅年青球員,希望麥湯文尼可以喺紅魔繼續成長,成為日後球隊嘅中場骨幹啦!

名稱:Scott McTominay 史葛麥湯文尼
年齡:23 歲
國家隊:蘇格蘭
位置:中場

不知不覺間麥湯文尼已經 23 歲,佢喺 2017 年 5 月 首次喺一隊上陣,而且喺各項賽事入面暫時代表曼聯上陣咗 75 場。
雖然麥湯文尼係喺英格蘭出世,但因為老竇係蘇格蘭人嘅關係,呢個年輕中場選擇咗代表蘇格蘭國家隊上陣,至今已經被徵召咗 12 次,對比競爭激烈嘅英格蘭國家隊,或者蘇格蘭國家隊可以畀到麥湯文尼更多機會出場啦。
麥湯文尼 5 歲開始就已經加入曼聯青訓系統,可以講話係真正嘅土炮青訓。而麥湯文尼早期其實係打前鋒位置,之後先畀預備組教練改造成中場。
麥湯文尼身高有成 1.93 米,高大嘅身型令佢擁有良好嘅制空力同埋身體對抗能力,不過其實佢早幾年嘅時候身型相當矮小,喺青年軍入面好輸蝕,但係突然喺兩年之間高咗成三十幾厘米,先令佢成功脫穎而出。
以年輕球員嚟講,麥湯文尼喺場上表現相當冷靜,好少有騰雞嘅情況發生,佢喺呢三年入面多數出任防守中場或者中場中位置。麥湯文尼有良好嘅護球同埋掃蕩能力,而高大嘅身型亦令佢曾經被安排客串中堅。
相信有睇過佢比賽嘅球迷都感受到佢果份熱血同埋激情,連蘇斯克斯都話佢有紅魔 DNA,唔知喺未來會唔會成為新隊長嘅人選呢?
而家曼聯中場位置有普巴 (Paul Pogba)、般奴費南迪斯 (Bruno Fernandes) 兩大鐵膽,喺三中場嘅情況下靜低一個位置,麥湯文尼仲要同馬迪 (Nemanja Matić) 同埋漸漸上力嘅費特 (Fred) 競爭,不過隨著馬迪年紀漸大,相信麥湯文尼嘅機會亦會愈嚟愈多。
除咗個人能力之外,佢嘅熱血亦係曼聯現時非常需要嘅元素,成為一隊常駐成員嘅麥湯文尼唔知下年會唔會轉波衫號碼,隨著洛荷 (Marcos Rojo) 可能離隊,如果佢繼承堅尼 (Roy Keane) 同埋卡域克 (Michael Carrick) 嘅 16 號,你又點睇?

=============================
本專欄已新設 Facebook 專頁,不定時上載英超新聞或文章,歡迎追蹤!
https://www.facebook.com/glory2utd/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→