巴塞12-13賽季總結 精選

一個賽季咁就完左啦！
今季的確有喜有悲，就等我做個小小嘅總結啦！
西甲：A
巴塞係西甲嘅表現的確非常好，令人滿意，惟一要挑剔嘅只係未贏過皇馬！季初雖然受傷兵困擾，但仍能係前半季力保不敗，破紀錄地係前半季19場比賽取得18勝1和嘅佳績。雖然之後要分心盃賽而偶爾輸波，但仍能以破球會紀錄同平西甲紀錄嘅100分完成球季！厲害厲害！當然，仲破左唔少紀錄！例如：西甲最大第一、二名積分差距：15分！西甲史上單季最多作客入球(52球) ! 球會史上單季最多西甲入球(115球)! 史上首支西甲球隊38輪都有入球！首位連續19輪都入波嘅球員——美斯！除左呢d紀錄，今季西甲嘅神射手同助攻王都係巴塞嘅球員，分別係美斯(46球)、小白(16球)！

歐聯：B+能夠連續6年打入歐聯四強，證明巴塞只要係來季作出一d改變，仍然可以保持住巴塞皇朝同力阻拜仁嘅崛起！今季嘅歐聯有兩個對賽，相信係唔係巴迷都一定會記得！一個喜，另一個悲！一個係對AC，另一個係對拜仁！能夠成為首支係首回合輸2:0仍能反勝對手嘅球隊，當然興奮！但又破歐聯歷史成為首支係四強被炒7蛋！今季嘅歐聯對巴迷黎講，真係唔知笑定哭好！

國王盃：B
係八強首回合，俾馬拉加係我地主場迫和2:2，不過最後都可以作客贏番4:2！到左4強，作客皇馬1:1以為幾好，點知番到主場輸左！:(

西班牙超級杯：B
首回合本來可以贏3:1，點知vv派膠！去到作客，上半場踢左一半都未夠，就俾人入左2粒仲要阿祖紅埋，不過巴塞冇放棄，之後大半場係打少一個都可以壓住皇馬踢，最後僅因作客入球不敵對手！可惜！
總結：B+啦！
希望尼馬嘅加盟可以減輕美斯嘅負擔同埋有多d進攻方式！之後再簽個中堅加強後防，相信下季本土賽嘅獎盃唔難攞曬，至於歐聯就要睇睇條籤同班球員嘅狀態啦！

黎緊要睇巴塞就冇啦，不過就有阿根廷嘅世界杯外圍賽同埋西班牙嘅洲際國家盃，仲有千千萬萬場買賣傳聞！

各位巴迷，你地又覺得巴塞今季係四條戰線嘅表現如何呢？下季嘅表現又會係點呢？