今夏十位值得列強競爭既自由球員(上) 精選

今季各地聯賽都畫上句號，意味住足球世界最瘋狂嘅時段:轉會窗又再一次開始，經過半季、一季，甚至多季嘅觀察，球會領隊們又要準備金錢去出手。但係喺大量高價嘅球員嘅選擇底下，唔知大家又有冇忘記一眾將於今夏成為自由身嘅球員呢？當中仲有唔少係稱得上平靚正，本文就為大家搜羅左今夏十位值得列強競爭既自由球員，此集為上集。

1. 占士米拿
直到執筆一刻，曼城都仲未成功同當年以2600萬簽入嘅占士米拿續約，實在令人大惑不解，原因有二：一，占士米拿係一個通天老倌，可以串演多個角色；二，佢係英人，正正係曼城陣中所缺乏嘅。曼城無理由讓佢白白離開。

占士米拿今季上陣四十場賽事，包括英超同歐聯，貢獻左八個入球同七個助攻。若然曼城未能成功同佢續約，相信會引起英超列強嘅爭搶，現時已有傳阿仙奴同利物浦對佢有興趣。

2. 基格納
基格納現年廿九歲，效力法甲馬賽，司職前鋒，佢既合約亦會於黎緊六月到期。其實以往基格納一直都有同唔同既英超球會傳出緋聞，例如阿仙奴、曼聯同利物浦等，但每次最後佢都未能成功令上述球會向佢投下信心既一票。今季基格納於各項賽事中射入廿三球，對西布朗、阿士東維拉呢啲隊中主力前鋒可能被撬走既中小型班黎講，基格納不失為一個好選擇。雖然基格納就快步入三十歲可能冇咩進步空間，但佢可以帶黎經驗。

3. 羅美路
雖然呢位阿根廷國門帶領祖國於2014世界盃奪得亞軍，但佢今季效力既森多利亞只能喺意甲排第七，而佢亦好大機會於季尾離開球隊。羅美路可能稱唔上係門神等級，但佢絕對係一位反應極快既門將，加上佢喺國際賽場既經驗，對唔少想於門將位置上補充實力既球隊黎講，係一個好選擇。例如利物浦一直物色緊人選取代鍾斯，不妨考慮下羅美路。

4. 尼祖迪莊
今季尼祖迪莊繼續都係AC米蘭防中位置上既主力球員，當佢冇傷或停賽既話，佢差一場就會喺意甲全勤上陣(包括擔任正選及後備入替)，證明佢依然係一位穩健既防中。隨住尼祖迪莊既合約快將到期，佢亦開始同英超球會扯上關係，例如曼聯。據報AC米蘭只肯以週薪三萬鎊既條件同尼祖迪莊續約，若然有英格蘭球會向尼祖迪莊開出合約，薪金應該會比三萬鎊多，始終尼祖迪莊有英超經驗，仲要贏過足總盃同英超冠軍。

5. 阿休
加納國腳阿休離開馬賽既傳聞已經出現左一兩年，今季尾終於會成真，因為馬賽球會主席話：「我地俾唔起其他英格蘭球會對阿休開出既條件。」廿五歲既阿休可以踢左翼同前鋒，今季主要喺左翼位置出現下，佢交出左十一個入波同六個助攻，成績相當令人鼓舞，此外佢亦以三個入球於2015非洲國家盃神射手榜上與三位球員並列第一。對佢有興趣既球會包括意甲既羅馬、國際米蘭，以及英超既紐卡素、熱刺同史雲斯。

好文共賞：重溫雲加既頭五次足總盃冠軍

若然你鐘意「隨心寫足球」，不妨讚好本版facebook專頁，本版會為大家繼續送上好文:https://www.facebook.com/footballvoicehk
大家睇左延伸閱讀既文未？未就睇完呢篇快啲睇下喇，多謝支持~