若迪基亞離隊既話，六位曼聯可考慮既替代品 精選 推薦

迪基亞呢幾年喺曼聯越戰越勇，屢次化解後防既險象。佢既表現據聞得到皇家馬德里既青睞，以致皇馬希望羅致佢，以取代把關多年既卡斯拿斯。皇馬向來財大氣粗，絕對有能力大灑金錢去買入心頭好，若然皇馬真係開出天價既報價，曼聯未必會拒絕。問題黎喇：如果迪基亞真係獲准離隊既話，曼聯可以用邊位門將取代迪基亞離去既空缺呢？以下係六位曼聯可考慮既替代品：
(迪基亞)

1. 域陀華迪斯
講起取代迪基亞，相信讀者都會諗：曼聯咪已經有個域陀華迪斯囉！冇錯，所以本名單上既第一人就係域陀華迪斯。跟隨巴塞打滾多年既佢膝傷後於曼聯作訓練，最後更獲得一紙合約。呢位前西班牙二號門將至今仍未代表過曼聯一隊上陣，如果迪基亞真係離隊既話，何不俾次機會佢呢？始終佢為巴塞把關多年，經驗同實力都累積唔少。
2. 漢丹洛域
漢丹洛域效力國際米蘭，效力接近三年以黎已經為國際米蘭上陣過接近一百場意甲。佢以往亦兩次被選入意甲最佳陣容之中，實力可見一班。呢位斯洛文尼亞國門其中一項強項係撲救十二碼，以往曾經於各項比賽中連續撲出六球十二碼。佢既合約將於16年夏天到期，相比有長約在身既球員黎講，曼聯應該唔使俾太高昂既費用。
3. 比高域
除左迪基亞之外，比高域亦曾經同皇馬傳出過緋聞，可見後者既能力絕對唔差。比高域係波斯尼亞既國門，曾經被選為波斯尼亞足球先生。佢與史篤城既合約一樣都係會於16年夏天到期，儘管史篤城不斷建議比高域續約，但佢遲遲唔肯簽名，原因係佢覺得史篤城唔夠野心。論野心，曼聯無可否認比史篤城高，野心同爭冠心絕對係曼聯搶走比高域既一大資本。
4. 佩連
佩連係門將界既後起之秀，出身自熱拿亞既佢，上季曾經被借至意甲既佩斯卡拉以汲取經驗，今季佢回到熱拿亞披甲。論實力，今季佩連既場均撲救有2.88次，比漢丹洛域同比高域還要好，而場均失球係1.15球，亦係三者之中最低。

可能會有人認為佩連既經驗會有不足，始終佢只係得22歲，但當年迪基亞加盟曼聯時只得20歲，仲後生過佩連。而且佩連亦有入選2014世界盃意大利23人名單，實力絕對唔會遜色。
5. 羅利斯
羅利斯近幾年既聲譽越黎越高，成為英超，以至世界球壇其中一位最強既守門員。呢位法國國門現效力熱刺，佢既情況同迪基亞有啲似，都係要不斷「上身」，然後力挽狂瀾。若然曼聯買入羅利斯，除左門將實力之外，曼聯仲可以得到羅利斯既領導能力：羅利斯曾經穿戴起熱刺同法國既隊長臂章，有佢喺後面指揮後防做定海神針，曼聯後衛可能會發揮得更好。
6. 施治
施治呢位車路士既十年功臣，今季因為新星古圖斯既回歸被眨至後備席，最近有新聞傳出佢會於季尾離隊他投。若然迪基亞今季季尾真係轉投皇馬既話，購入施治不失為一個好選擇，施治於呢十年黎已經證明左佢既高水平，相信佢仲大把貨交。雖然施治已經32歲，但當年曼聯一樣買入34歲既雲達沙，成為後舒米高時代第一位費格遜完全信得過既門將。唔知施治會唔會成為繼馬達後，又一位轉投曼聯既車路士球員呢？
若然你鐘意「隨心寫足球」，不妨讚好本版facebook專頁，本版會為大家繼續送上好文:https://www.facebook.com/footballvoicehk

大家睇左下面延伸閱讀嘅文章未呢？未嘅就快啲click黎睇喇~

原文,經編輯