歐洲五段最長既不敗紀錄 精選

講起不敗紀錄，相信大多數讀者都會諗到阿仙奴於英超所創下既跨季49場不敗紀錄，佢地於嗰49場比賽中只係和左13場，贏足36場，呢一段佳績令阿仙奴成功奪取2003-2004年既英超冠軍，其他球隊要模仿呢49場既不敗旅程絕不容易。將近50場既不敗紀錄似乎已經夠長，但現實係天外有天，世上更長既不敗紀錄，我地一齊睇睇歐洲五段最長既不敗紀錄。
(被稱為不敗傳奇既阿仙奴)

5. 皇家聖基爾萊斯聯
皇家聖基爾萊斯聯係一隊黎自比利時既球隊，佢地喺1933-1935年間締造過60場不敗紀錄，理所當然地，佢地成功成為1932-1933,1933-1934同1934-1935既比甲冠軍。之後後人更取皇家聖基爾萊斯聯隊長柏比特之名，創立柏比特盃，頒予比利時頭三級聯賽中擁有最長不敗成績既球隊。而家皇家聖基爾萊斯聯於比利時第三級聯賽中作賽，雖然如此，佢地仍然因為嗰段傳奇既歷史而受比利時人認識。
4. 塔林利華迪亞
可能會有讀者問：「呢啲不敗紀錄係咪全部都係幾十年前被設下架？」答案當然係否定既。愛沙尼亞球隊塔林利華迪亞於2008-2009球季造出左一股61場既不敗走勢。不過時任領隊普恩斯承認，球隊可以不敗咁耐既原因係佢地缺乏一個可以同佢地制衡既對手，令佢地變得無敵。呢61場不敗紀錄協助塔林利華迪亞連奪4屆愛甲冠軍，佢地亦係首次打入歐協盃分組賽階段既愛沙尼亞球隊，但仲未有機會喺歐聯亮相。

3. 些路迪
些路迪應該係呢張名單中最為人熟悉既球會，作為蘇格蘭班霸既佢地岩岩早兩日先擊敗左登地聯，拎到今季蘇格蘭聯賽盃冠軍。些路迪係成個英國最長不敗紀錄既保持者：佢地於1915-1917年創下左62場不敗紀錄，當時帶隊既係隊史第一位領隊馬利。先前講過阿仙奴試過49場不敗，但些路迪喺嗰62場入面已經贏左49場，呢62場入面仲有兩場係同一日踢既添，呢段輝煌歷史絕對係些路迪建立名聲既一大根基。
2. 舒列夫
舒列夫位為摩爾多瓦，係摩爾多瓦足球聯賽既班霸球隊，由2001年起直至現在，佢地只失卻2011年既聯賽冠軍，其他都係佢地既囊中之物，總共十三屆。睇到呢度，各位讀者可能都會覺得舒列夫可以長期保持不敗都係意料中事。舒列夫曾經造下63場不敗強勢，最後才被野牛隊擊敗。
1. 布加勒斯特星隊
上面4隊球隊既不敗走勢其實都係相差一場，但係星隊既不敗紀錄就完全拋離左佢地。布加勒斯特星隊黎自羅馬尼亞，係一間首都球會兼班霸，係近兩年既羅馬尼亞足球甲級聯賽既冠軍得主。星隊於1986至1989年間締造左不可能既106場不敗紀錄，當中佢地試過於86年歐冠盃(現稱歐聯)決賽以互射十二碼氣走巴塞隆拿，成為第一支奪得歐冠盃既東歐球隊；當然，佢地亦囊括左不敗時期既四座國內聯賽冠軍。

好文推介:利物浦爭逐前四的發電機—古天奴

好文推介:英國球場的古與今小測驗，你猜得對嗎?

若然你鐘意「隨心寫足球」，不妨讚好本版facebook專頁，本版會為大家繼續送上好文:https://www.facebook.com/footballvoicehk

原文,經編輯