英超史上一同上陣次數最多既五對球員

隨心寫足球 於 22/02/2015 發表 收藏文章
喺現今既球壇,尤其是喺英超呢啲頂級聯賽入面,人事變動真係可以好大,一隊波可能過三五年就變得面目全非,一個球員要喺一隊英超球隊踢得耐已經唔簡單,要得一個可以長年共同作戰既戰友就更加難。但係以下呢五對球員就係成功既例子,佢地有幸有一個隊友可以同佢地征戰沙場多年,除左係隊友之外,佢地甚至可以發展成一對好友,我地而家一齊倒數英超史上一同上陣次數最多既五對球員:

5. 積斯基拿倫,路蘭
(4號為路蘭, 22號為積斯基拿倫)

講起積斯基拿倫,大家可能都會提到唔識串佢個名(Jääskeläinen),但係大家又知唔知佢有一個多年既隊友—路蘭呢?積斯基拿倫同路蘭於90年代末期到千禧年代一同為當時仍於英超作賽既保頓既球員,積斯基拿倫效力保頓足足有十五年,而路蘭亦於保頓付出過十年青春,令佢地有大量合作機會,佢地總共一同踢過300場英超比賽。雖然佢地兩個都離開左保頓,但而家卻一齊效力韋斯咸,相信佢地仲有機會一同上陣比賽。

4. 加利尼維利,史高斯
喺現今既球壇中,搵到一個忠誠既球員係唔容易既,但曼聯就非常好彩咁有幾個願意長期留隊既球員。加利尼維利同史高斯就係當中既例子,加利仔於1991年加盟曼聯,史高斯亦喺同年加入奧脫褔,佢地與其他五位球星組成左為人所熟悉既「七小福」。雖然加利仔同史高斯一個係中場,一個係後衛,但佢地卻係唔同既位置上陪伴曼聯經歷過高與低,並一齊上陣過302場英超,現時兩人都已退役。

3. 泰利,林柏特
雖然林柏特而家已經轉投藍月亮曼城,但要講起車路士既近代傳奇,佢一定榜上有名。除左林柏特之外,泰利亦係其中一個車路士既代名詞。以前泰利同林柏特分別係車路士既正副隊長,一個鎮守後防,一個則喺中場策動攻勢。佢地一齊為車路士於英超征戰351場,比排上面第四既一對球員多成接近五十場,泰利同林柏特為車路士贏得唔少錦標,例如英超等。

2. 史高斯,傑斯
上面加利仔同史高斯嗰一段講到佢地與五位球員組成左「七小福」,而傑斯亦係其中之一。傑斯與史高斯一樣都係中場球員,一個踢邊路,另一個就踢中路,合力於英超為曼聯上陣358次,係曼聯贏得大量錦標既功臣,傑斯一個人已為曼聯於英超上陣632場,而史高斯亦有500場,所以佢地有咁多場一同上陣既英超比賽亦屬正常。

1. 謝拉特,加歷查
唔知大家估唔估到排第一位既係佢地兩個呢?老實講筆者都估唔到原來佢地係排第一。謝拉特同加歷查效力時,利物浦拎過歐聯,登過歐洲之巔,但亦試過為爭入歐洲賽而苦苦作戰。可幸既係佢地兩個對利物浦展示出最大既忠誠,於球隊低潮時對球隊不離不棄,除左獲得球迷稱讚外,亦令佢地互相搵到生涯中最好既戰友,佢地一同上陣過383場英超,成為第一位。

好文推介: 五位不堪回想佢地處子戰既球星

請讚好「隨心寫足球」,本版會為大家繼續送上好文:https://www.facebook.com/footballvoicehk

原文,經編輯
標籤: 英超  保頓  曼聯  車路士  利物浦  

留言


請按此登錄後留言。未成為會員? 立即註冊
快捷鍵:←
快捷鍵:→