阿仙奴終於搵到佢地需要既人？ 精選

阿仙奴球迷等左咁耐，終於等到愛隊響冬季完成首簽，只可惜嗰位新球員並唔係槍迷期待既「即食」球員，而係年輕中場比歷(Krystian Bielik,暫譯)，要讓阿仙奴冬季轉會任務變得完滿，雲加有必要響西甲維拉利爾買入巴西後衛包列斯達(Gabriel Paulista)。

簽入比歷固然令人感到興奮同期待，但佢似乎未可以對阿仙奴一線隊起到一個即時既作用，一黎佢只得17歲，經驗未夠，二黎儘管佢今年響波蘭甲組足球聯賽既華沙歷基亞踢得唔錯，波甲同英超既水平同比賽風格仍然有一大段距離，所以佢需要一定既時間去成長同適應。雖然雲加話比歷將會係阿仙奴一線隊既一員，但顧及到阿仙奴下半季要急於搶分，相信比歷既上陣機會都係唔會太多。

大家可以回想番禾確特既交易，當年17歲、效力於修咸頓既佢一樣都係響冬季加盟阿仙奴，雖然佢當時又係被譽為明日之星，佢響加盟兵工廠既首半季都係苦無上陣機會，取而代之既係一段等佢適應響大球會生活既時間。相信比歷而家要做既野同當年禾仔要做既差唔多，而且阿仙奴都唔會急於派呢個防中上場，因為最近陣中已經有一鳴驚人既高基連彈出。

但係阿仙奴需要中堅既問題仲未解決，後防兵源唔夠既問題響迪布治缺陣後更顯嚴重。(題外話：曼聯一樣有中堅問題，按我睇下邊個解決到。)不過好彩既係，雲加似乎已經搵到解決問題既答案：包列斯達。呢位24歲既中堅今季以侵略性高既盯人風格贏得唔少掌聲，最重要既係，佢係後防線上既通天老倌，可以勝任中堅同左右兩閘既位置。

包列斯達本人其實都洩露左少少風聲，話俾大家聽自己有同阿仙奴傾過下計，佢話：「無論我轉投阿仙奴定留隊，我都會保持冷靜，暫時黎講我會繼續專注於維拉利爾，我既經理人已經做緊野，以使我唔使擔心太多。」阿仙奴可能會認為黃色潛艇唔會放人，因為包列斯達今季係陣中重要既一員，但其實黃潛主帥馬些連奴既說話暗示阿仙奴有可能帶包列斯達去酋長球場，佢話：「我並冇為包列斯達講既野覺得難過，每個球員都有佢地自己既意見。佢表現得非常專業，因為佢仲係專注於維拉利爾，我地當然想佢留隊，但我地都要考慮到佢既個人意願，若然包列斯達同維拉利爾都覺得俾佢離去對各方黎講都係最好既選擇既話，我地會放佢走。」

馬些連奴咁講，可能因為佢知道呢單轉會佢未必話到事，因為據報包列斯達既合約上有一項大約2000萬歐元既買斷費協議，響包列斯達成功申請到英超工作證既前題下，如果阿仙奴既出價符合到買斷費既話，維拉利爾會方都做唔到啲咩野，只可以睇住包列斯達成為阿仙奴既一員。
轉會窗接近尾聲會成為一個誘因，令雲加加快手腳簽入包列斯達，完成補充後防線既目標。

若你鐘意「隨心寫足球」，請like以下專頁:https://www.facebook.com/footballvoicehk

原文