九個曾經俾人睇低既頂級球星

隨心寫足球 於 11/01/2015 發表 收藏文章
有好多頂級球星,響而家贏盡球迷掌聲之前,都有過一段低迷期:響嗰段時間,佢地可能受盡球迷既嘲笑、批評,但可幸既係,佢地憑住努力同信念,成功克服低迷表現既陰霾,成功響球迷面前表現自己。呢篇文章將會列出九個曾經俾人睇低既球員,佢地就算唔係頂級都係好波之人,事不宜遲,即刻開始:

1. 迪基亞 (D. De Gea)
今年迪基亞左飛右撲,為曼聯守住個英超第三既位置。2011年夏天以1980萬鎊由馬體會加盟曼聯既佢其實起初表現得唔好,未能穩陣咁把守曼聯既最後一關,並且時有犯錯,同轉會之前響馬體會既穩健可謂大相逕庭,2012年既球評都係以"error-prone"形容佢,佢當年既犯錯例子包括打手鎚變左打空氣、落地過慢。除左表現低迷之外,佢又被傳偷冬甩,成為一時熱話。而家佢既良好表現當然係有目共睹啦,屢救險球,可能已經令球迷忘記佢11/12球季季初既蝦碌表現。

2.加里夫巴爾 (G.Bale)
2007年加里夫巴爾由修咸頓轉投熱刺時冇人會諗到佢後來會打破轉會費紀錄,而家亦好難想像呢位天價球星曾經俾人嘲笑過,加里夫巴爾曾經被熱刺球迷認為係「受詛咒既球員」,因為佢頭24場為熱剌上陣既英超結果都係不勝,而伯明翰響2010年曾經想用300萬鎊帶佢走,邊個又會估到留左響熱刺既巴爾越踢越好(代表作有對國際米蘭既爆速入波),並且響13年夏季轉投皇馬,為皇馬贏得歐聯。
http://www.rankopedia.com/CandidatePix/3310.gif

3.藍斯 (A.Ramsey)
藍斯響2010年2月對史篤城時俾梳爾高斯踢斷腳,其職業生涯響嗰一刻跌至谷底,呢位威爾斯中場響傷癒後好辛苦咁去重拾狀態同信心,例如佢被外借過去諾定咸森林同借返去卡迪夫城去重拾比賽節奏。不過佢其後重返阿仙奴,佢既表現都為人所詬病,但係上季佢既狀態突然變得火熱,響23場英超射入左10球,當中不乏靚波。

4. C.朗拿度 (C.Ronaldo)
當C朗2003年由士砵亭轉投曼聯時,冇乜人懷疑過呢位葡萄牙人既能力,但其後佢就不斷俾人話佢獨食,同埋做埋哂啲冇用既插花,當年有部份曼聯球迷話佢地要既係穩健既球員,而唔係華而不實既球員,將矛頭直指C朗。不過之後幾年,C朗進步神速,成為世上最佳球員之一,佢既故事如何相信大部份讀者都知,呢度就唔詳談喇。

5. 軒達臣(J. Henderson)
響軒達臣以2000萬鎊加入利物浦冇幾耐之後,大部份利迷都覺得佢地「中哂伏」:軒達臣既表現完全對唔住買入佢既價錢,據報當年利物浦既足球總監Damian Comolli亦因為買入軒達臣而賠上左自己份工。不過加入紅軍三季之後,軒達臣開始成為球隊其中一粒重要棋子,用之不盡既能量以及不時製造到入球機會既位置感都係佢既長處,而下年佢有可能會從離隊既謝拉特接過隊長臂章。

6.普巴(P. Pogba)
曼聯獨具慧眼,2009年就響勒哈費爾羅致普巴,不過費格遜似乎冇點將普巴睇上眼,響曼聯陣中四年,普巴響一線隊既上陣機會寥寥可數,通常只係響對弱隊既盃賽中上下陣,佢入隊三年先有第一次響英超登場既機會。響2012年,佢免費轉會去祖雲達斯,之後越踢越好,而家已經係祖記同法國既核心球員,贏得意甲及2013年既歐洲金童獎。

7.尼曼查馬迪 (N. Matic)
車路士早響2009年買入馬迪,不過呢位塞爾維亞人帶唔到啲咩去史丹福橋,佢只係上陣左幾場比賽就被賣去賓菲加,響上年1月既冬季轉會窗,車路士買番呢位昔日被賣出既球員,不過今次馬迪已經係截然不同既另一個人,賓菲加主帥Jorge Jesus將馬迪由一個中場指揮官改變成為一個防守中場,而馬迪亦響防中位置上「茁壯成長」。而家馬迪係車路士中場其中一位核心,領導中場防守工作,係車路士良好表現既重要因素之一。

8.謝洛美保定 (J. Boateng)
謝洛美保定響曼城渡過左2010-11球季,佢當年響球迷心中留下左唔好既印象,唔知係唔係當時主帥文仙尼唔識用佢,佢被指踢法懶散同球技未夠水平,但隨後一年佢轉會拜仁,表現穩步上揚,為拜仁贏得歐聯、德甲等錦標,亦響上年既巴西世界盃以神勇表現為德國隊贏得冠軍。

9.科蘭 (D.Forlan)
科蘭係費格遜其中一個最失敗收購,佢響2001年加盟曼聯,而響加盟首季佢係一球波都入唔到,響效力三年間都只係入到10球。但係佢當年轉投西甲維拉利爾後就如魚得水,第一季就贏得西甲神射手,其後響效力馬體會期間再拎多一次,成為當時其中一個最有殺傷力既前鋒,而響2010年世界盃,科蘭亦贏得金球獎。

以上例子話俾我地知,每個球員都可能有佢自己既低沉期,但可以突然變得一鳴驚人,如果讀者們覺得邊個球員而家好廢既,真係要做好心理準備幾年後佢變到勁好波令你地無聲出喇。

若你鐘意「隨心寫足球」,請like以下專頁:https://www.facebook.com/footballvoicehk

原文,內容經過編輯

留言


請按此登錄後留言。未成為會員? 立即註冊
    快捷鍵:←
    快捷鍵:→