贊奴沙在被遺忘嗎?

隨心寫足球 於 13/01/2015 發表 收藏文章
上場曼聯對修咸頓既賽事中,曼聯主帥雲高爾冇將法卡奧放入18人名單之中已經搞到滿城風雨,但佢唔係唯一一個被遺下既有名球員,上季響莫耶斯帶領既曼聯大展光芒既比利時新星贊奴沙一樣唔響名單入面。雲高爾唔放法卡奧入十八人名單入面完全令人大跌眼鏡,但贊奴沙要響觀眾席上面睇波就似乎冇咁令人感到意外。

贊奴沙已經兩個月冇踢過正選,佢上一場上陣係1月1日對史篤城嗰陣,當時佢後備入替梳爾打左翼衛,可惜表現得唔好。今季佢只係正選上陣過四次,上年同一時間佢已經踢過十二次正選喇。而家響雲高爾既帶領下,贊奴沙唔單止可能覺得隊中競爭大左,甚至搵唔到自己既角色,雲高爾今季試過將贊奴沙放響左翼衛、右翼衛、中場中同埋前鋒,但放佢響咩位置上佢似乎都踢唔出上年咁驚人既水準。

當曼聯球迷發現雲高爾上場冇將法卡奧放入十八人名單時都可能有唔同程度既不解同憤怒,大部份人都覺得起碼要將法卡奧放響後備席上;但係雲高爾唔放贊奴沙入十八人名單既決定就相信冇咩人覺得係一個錯誤,甚至唔為意添。曼聯輸俾修咸頓後記者會入面,雲高爾唔止一次被質問點解唔用法卡奧,相反有關贊奴沙既查詢既次數完全係零。

睇住一個上季大放異彩既球員響今季開始被遺忘既感覺好心酸,上季贊奴沙可能係曼聯既唯一驚喜,而今季隨住星級前線球員加盟曼聯,佢既上陣機會大大減少,前景亦不容樂觀。曼聯將會響1月17日迎戰QPR,汲取對修咸頓時進攻乏力既教訓後,屆時法卡奧好可能會復任正選,但係贊奴沙就可能冇咁好彩喇。
(迪馬利亞,法卡奧,今季加盟曼聯的星級球員)

今季本身應該係屬於贊奴沙既一季,係俾佢證明自己係曼聯新星同進步既一季,佢要向球迷們證明自己有能力著得起傑斯留落黎既11號波衫,但現實係上場佢只可以同安達臣、賓艾莫斯之流響看台上睇波。希望佢好好把握唔多既上陣機會,令雲高爾對佢重拾信心。

若你鐘意「隨心寫足球」,請like以下專頁:https://www.facebook.com/footballvoicehk

經編輯原文
標籤: 曼聯  贊奴沙  

留言


請按此登錄後留言。未成為會員? 立即註冊
    快捷鍵:←
    快捷鍵:→