英超史上五位最年輕上陣既球員

隨心寫足球 於 25/08/2015 發表 收藏文章
英超進入到第三週,其中一大發現係第一週既「年輕大鎖」奧斯福,佢以16歲236日之齡為韋斯咸於英超上陣,以廿三日之差擊敗前輩比利威廉斯,打破隊史紀錄,並且據聞引起幾隊強隊既興趣,當中包括曼聯同曼城等。可惜綜觀整個排名榜,奧斯福只係可以排於第七位,咁英超史上五位最年輕上陣既球員係邊五位呢?我地不妨黎睇睇:

5. 巴斯達
巴斯達自六歲就加盟愛華頓,係愛華頓既青訓產品,並於2008年成功擠身拖肥糖既一線隊。巴斯達終於喺08-09年球季既首場聯賽成功得到首次上陣英超既機會,佢喺比賽末段被換入,踢左大約十幾分鐘比賽。儘管以16歲191日打破隊史最年輕於英超上陣紀錄,巴斯達未能乘勢成為主力,三季以來只能夠上陣十三場,最終被愛華頓放走。踢過英甲奧咸一季後,巴斯達轉投錫菲聯,並效力至今。

4. 赫般梅菲
赫般梅菲效力於老牌球會阿士東維拉,係土生土長既伯明翰人,佢以16歲176日之齡成為維拉最年輕於英超上陣既球員。值得一提既係:佢並唔係維拉隊史中最年輕上陣既一隊球員,呢個紀錄係由占美布朗於1960年代創下,當時占美布朗只得15歲349日大。講番赫般梅菲,佢係喺上季造出呢個紀錄,於維拉大勝新特蘭4-0既英超中後備上陣七分鐘,而教頭舒活對呢位年青人信心滿滿,補充話:「佢係一位有天賦既球員,並且係球隊既將來!」

3. 艾朗連儂
艾朗連儂可能係呢張名單中最讓人熟悉既一個,對於出生於列斯既佢,列斯聯自然最好既出道選擇。於03年8月,佢成為當時史上最年輕於英超上陣既球員,只得16歲128日大。除左呢個紀錄,佢亦係史上最年輕受球鞋贊助既球員。艾朗連儂出頭之時正值列斯聯財困,被逼以100萬英鎊轉投熱刺,而佢亦以白鹿徑為家,效力熱刺長達十季,只在上季短短外借過到愛華頓。

2. 伊斯布朗
伊斯布朗同第四位既赫般梅菲一樣可以出任前鋒,亦係最近先漸露頭角既一群;唔同既係:佢地分別出身於英格蘭中西部兩隊死敵—伊斯布朗來自西布朗。伊斯布朗喺13年一場西布朗對韋根既比賽後備上陣四分鐘,以16歲117日成為英超最年輕上陣球員第二位,而該場亦係佢為西布朗上陣既唯一一場英超,因為當年夏天車路士就將佢帶到史坦福橋球場。現時伊朗布朗被外借到荷甲維達斯。

1. 碧格斯
第一名既碧格斯以16歲68日成為英超最年輕上陣球員,當時佢效力既球會係現已降落英冠既富咸。第一場英超為佢帶黎大約十三分鐘既上陣時間,而接落黎既七季佢不幸地只得十三次機會於英超比賽,當中更輾轉被借至唔少球會,包括彼德堡、屈福特及比斯托城等。上季佢轉投英冠加盟米禾爾,積極尋找重生機會,可惜仍然上陣次數仍然未得進步,今季佢再落一級到英甲加盟高車士打,希望呢位剛決定代表南美洲小國圭亞那既左閘可以搵到自己既未來!


請讚好隨心寫足球,繼續與大家分享有趣文章:https://www.facebook.com/footballvoicehk

參考文章1
參考文章2

留言


請按此登錄後留言。未成為會員? 立即註冊
    快捷鍵:←
    快捷鍵:→