曼聯可以選擇免簽既三名右閘 精選

今年曼聯由皇馬買入迪馬利亞同響摩納哥借入法卡奧，使前線星光熠熠，但雲高爾而家要開始執一執個防守喇，今季右閘拉菲爾時有受傷，上陣時間唔穩定，而代替佢既華倫西亞其實更適合打翼位，而唔係後衛，所以曼聯其實可以諗諗買番個右後防返黎為後防線補強。


隨住2015年既來臨，唔少右後衛同球會既合約就只剩半年，曼聯可以嘗試去同佢地傾下，有可能可以響夏季轉會窗免費帶佢地入隊。雖然曼聯已經向外界展現出佢地一樣有驚人財力，但可以「免簽」既又何樂而不為呢？黎緊響呢篇文章，我地會講下三個曼聯可以「免簽」既右後防球員。

1.列治史迪拿(S.Lichtsteiner)
祖雲達斯後衛列治史迪拿係黎緊夏季轉會窗其中一個最受歡迎既球員，據聞好多球會都有意簽佢，《Daily Express》都話曼聯想帶佢去奧脫褔，因為30歲既列治史迪拿效力祖雲達斯、拉素同里爾既時候有好多聯賽同歐戰經驗。佢今季聯賽平均每場有1.7個攔截同0.9個截斷傳球，防守方面比拉菲爾既場均2.2個攔截同2.2個截斷傳球為差，但佢16場比賽中拎到2個入波同4個助攻，佢可能會適合雲高爾既進攻體系。
2.阿比迪(I. Abate)
AC米蘭既阿比迪係另一個擁有豐富經驗既球員選擇，佢而家只係28歲，去到奧脫福既話應該都仲有大把貨賣，據《Daily Mirror》所指，利物浦其實都想引入呢位意大利球員，取代可能離隊他投既右閘格連莊臣。同華倫西亞差唔多，阿巴迪都係有速度既球員黎，不過佢心態比華倫西亞較為防守化，有助提升曼聯既後防線。由於阿巴迪既攔截表現(場均1.4個)冇拉菲爾咁好(場均2.2個)，佢要利用佢既閱讀球賽能力去幫佢防守，佢場均2.7個截斷傳球比華倫西亞(場均1.7個)同拉菲爾(場均2.2個)都要好。另外，今年佢響11場意甲交出四次助攻，可以幫助球隊進攻方面既表現。

3.丹尼爾艾維斯(D. Alves)
響巴塞隆拿踢左七年波既丹尼爾艾維斯可能係三位候選人當中能力最高既一位。響前巴塞主帥哥迪奧拿既體系下，丹尼爾艾維斯既進攻能力同前插能力為巴塞既進攻戰術增加左可變性，令巴塞既進攻變得更恐怖。作為一個出擊型右閘，丹尼爾艾維斯既場均攔截(4.1個)係呢篇文出現過既所有右閘中最高，加上而家佢同巴塞續約問題上仲係未有定案，曼聯又點會對佢冇興趣呢？所以佢絕對有可能好似前隊友域陀華迪斯咁加入曼聯。
到底曼聯會唔會入一個右閘呢？答案就要留待時間交待喇。

若你鐘意「隨心寫足球」，請like以下專頁:https://www.facebook.com/footballvoicehk

原文,內容經過編輯