十個球員「以衫傳話」既時刻

隨心寫足球 於 21/01/2015 發表 收藏文章
足球係一門充滿情感既運動,有喜有悲,有時球員會響T恤上寫上字句,響入波後拉高波衫或慶祝時著上T恤,去講佢心入面想同球迷、摯愛講既野,呢篇文章會為大家送上十次球星以衫上文字同大家講野既時刻:

1.恩尼斯達
響2010年既世界盃決賽入波後,效力於巴塞隆拿既西班牙中場恩尼斯達選擇響足球界最高殿堂去悼念佢既同胞丹尼爾哈爾克,呢位當年效力於愛斯賓奴既中堅於2009年因心臟病逝世,享年26歲。

恩尼斯達既底衫上寫有「丹尼爾哈爾克:永遠與我們一起」,雖然愛斯賓奴係巴塞隆拿既死敵,但恩尼斯達仍然選擇向哈爾克送上最高致意,其後恩尼斯達將件衫送左俾愛斯賓奴,讓愛斯賓奴永遠紀念一生只效力過該隊既哈爾克。恩尼斯達話過雖然佢知道愛斯賓奴球會係放置該底衫既最佳地點,但要佢真係要交件衫出黎既時候,仍然覺得非常之不捨。佢再補充:「雖然係我入波,但哈爾克亦會被世人記住。」

愛斯賓奴前主席Sanchez Libre話高度讚揚恩尼斯達,並話:「恩尼斯達係個偉大既球員,當佢退役時,愛斯賓奴以至全世界既球迷都會記得佢。」

順帶一提,拉莫斯有贏得2012歐國盃隊亦穿上過T恤,以紀念前西維爾隊友佩亞達。

2.伊恩胡禮
伊恩胡禮係阿仙奴史上其中一位最偉大既前鋒,亦係三獅軍團以往既一位重要球星。當佢響阿仙奴既生涯接近尾聲時,佢極渴望打破巴斯甸(C. Bastin)當年為阿仙奴射入178球既最多入球紀錄。伊恩胡禮終於響對保頓既一場比賽中達成目標,佢入左第一球之後只係追平紀錄,但佢已經拉高衫慶祝,佢件衫係寫住「179, Just Done It」,不過唔緊要,佢最後響嗰場波大演帽子戲法,始終都係破到紀錄。

3.亨利
亨利亦都係阿仙奴史上另一個偉大射手,佢甚至破埋伊恩胡禮既入球紀錄。響2000年對利物浦既賽事中,亨利為阿仙奴射入一球,一劍封喉,帶領十人應戰阿仙奴以1-0小勝有兩名球員被逐既利物浦。當時,亨利拉高波衫,底衫寫住「Bang goes the 0-0 draw」同大家講三年黎終於有阿仙奴球員響利物浦身上取得入球。

4.亨利(又係佢)
亨利響2001年主場3-1擊敗曼聯既比賽中入到波,令佢又一次有機會用底衫上既字帶出自己既訊息。佢入波後拉高波衫,展示出「For the west indies」既字樣,話俾大家聽:雖然佢已經貴為一個法國國腳,但佢仍然未忘過根。據前阿仙奴前鋒阿倫史密夫(唔係踢過曼聯嗰個)補充,「For the west indies」係指亨利父親既出生地—瓜德羅普(法國的一個海外省)。

5.馬特拉斯
故事發生響國際米蘭贏得三冠王既球季,馬特拉斯響贏得歐聯冠軍後,把握機會著上印有「你想要嗎?」既T恤,向祖雲達斯示威。點解馬特拉斯要串祖雲遠斯呢?事源係祖雲達斯要求賽會以國米打假波既原因褫奪國米05-06球季既意甲冠軍。似乎當年既馬特拉斯真係好被抑壓,所以佢贏到歐聯後都記得要著上T恤向祖記抗議,而唔係第一時間走去慶祝。

6.皇家馬德里
體育精神響兩隊死敵之間未必常見,當時巴塞球員艾比度發現肝有腫瘤時,皇家馬德里球員卻響同里昂既比賽前著上鼓勵艾比度早日康復既T恤。而當時亦有其他球隊或球員響艾比度治療時著上T恤以示支持。
(巴塞)
(羅馬)
(夏薩特)

順帶一提,保頓球員梅安巴響對熱刺既比賽時心臟停頓,搶救成功後,唔少球員亦有著上鼓勵佢早日康復既T恤。(包括上面皇馬圖中前排既拉辛拿迪亞拉)

7.科拿
科拿響1997年為利物浦上陣對白蘭恩既賽事中,以底衫上既文字為碼頭工人打氣。當時利物浦市有500名碼頭工人因罷工而被炒魷魚,而呢位利物浦既傳奇前鋒以有政治味既慶祝方式向表示支持及同情。因為政治表態,科拿被歐洲足協罰款,但佢已經贏盡一大班利物浦球迷既心。

8.利物浦
當蘇亞雷斯因向當時曼聯艾夫拿說出種族歧視語句而被罰停賽後,利物浦全隊球員都穿上引有蘇亞雷斯既T恤,以響該烏拉圭隊友表示支持。當然,利物浦全隊球員都被批評,而呢一件事亦係杜格利殊離任利物浦主帥既其中一個原因。

9.巴路迪利
最多人記得既「底衫慶祝」可能會係巴路迪利響曼城大勝曼聯1-6時展示既既「Why Always Me?」,佢打出呢句既原因係:佢唔明白點解成日都只係佢啲好笑或錯事被報導,佢既能力同好事就冇乜人知道咁。佢而家可能冇以前咁嬲或者咁感到困惑,但佢既好笑既事仍然長存大家心中。

10.卡卡
AC米蘭響2005年歐聯決賽被利物浦世紀大逆轉之痛去到2007年終於可以舒緩一下,AC米蘭響決賽以2-1擊敗利物浦,一報兩年之仇。當AC米蘭球員大肆慶祝既時候,卡卡卻跪響地下,展示出「I belong to Jesus」既衫,向世人顯示自己既宗教信仰。其實卡卡當時都已經唔係第一次著上有宗教訊息既衫,但響贏得歐聯後再次展示,證明佢響生涯到達巔峰之時仍能顯示自己既謙卑,睇得出佢對信仰既忠誠。

若你鐘意「隨心寫足球」,請like以下專頁:https://www.facebook.com/footballvoicehk

原文

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Jim Lck
    Jim Lck 於 21/01/2015 評論 NO. 1

    英超 零入球者:
    Why alway me?

  • Fei Wang
    Fei Wang 於 21/01/2015 評論 NO. 2

    势不可去尽

  • Chun Kit Yip
    Chun Kit Yip 於 21/01/2015 評論 NO. 3

    卡卡!!

  • Dimitar Kwok
    Dimitar Kwok 於 21/01/2015 評論 NO. 4

    Keep calm and pass me the ball......

  • Daniel Chan
    Daniel Chan 於 21/01/2015 評論 NO. 5

    很想要吧 - 馬特拉斯

  • Li Siu Long
    Li Siu Long 於 21/01/2015 評論 NO. 6

    卡卡真男神

  • Howard Lau Yiu Chung
    Howard Lau Yiu Chung 於 21/01/2015 評論 NO. 7

    馬特拉斯同巴神都好正

  • Billy Tsang
    Billy Tsang 於 21/01/2015 評論 NO. 8

    卡卡!🙏🙏🙏🙏

  • Li Pak Him
    Li Pak Him 於 22/01/2015 評論 NO. 9

    查基就查基 哈咩爾克 改番粵語譯名係咪真係咁難

  • Yun Ting Chan
    Yun Ting Chan 於 22/01/2015 評論 NO. 10

    諗起拉莫斯…

  • Cheuk Kei
    Cheuk Kei 於 22/01/2015 評論 NO. 11

    HEA 碧呢

快捷鍵:←
快捷鍵:→