利物浦可考慮既三位英超前鋒 精選

(注意：本文中，今季指14-15球季，上季指13-14球季)

喺過去嘅一季，相信唔少利物浦球迷都非常懷念蘇亞雷斯。缺乏入球能力同進攻嘅驅動力令羅渣士嘅球隊未能延續佢地13-14球季嘅精彩表現。利物浦唔係冇為蘇亞雷斯嘅離去做野，佢地先後買入域奇林拔、巴洛迪利，同喺新特蘭收回波連尼，希望其中一位可以大爆發，擔當鋒線嘅核心。可惜現實係事與願遺，幾位前鋒都狀態低迷，加上史度列治又有一段時間因傷避戰，使利物浦今季嘅英超入球數縮水一半。以下呢三位球員又會唔會係紅軍鋒線嘅新希望呢？
1. 查理柯士甸
據外國傳媒報道，利物浦對昆士柏流浪嘅核心查理柯士甸相當有興趣，打算以1500萬鎊收購。以查理柯士甸上季嘅表現，相信佢唔會隨隊返英冠打拼，離隊他投只係時間問題。
自羅渣士入主利物浦起，佢一直都有起用同培育英格蘭嘅本土球員，喺今個轉會窗，佢就先後邀請左恩格斯同占士米拿兩位土炮加盟。佢呢個理念讓查理柯士甸呢位英格蘭人加盟嘅呼聲更加高。

今季查理柯士甸係表現最優秀嘅英格蘭人之一，於三十五場英超中射入十八球，而且射中龍嘅百分率接近七成，要記住今季只係佢第一年踢頂級聯賽。不過佢冇蘇亞雷斯落黎幫手做波嘅能力，羅渣士真係購得此將嘅話，可能要重新度一度個進攻戰術。

2. 祖維迪
話祖維迪仲未證明到曼城為佢付出嘅2200萬鎊，相信都冇乜人會反對。13年加盟，卻只踢過30場英超，絕對係叫人失望。今季一月，柏歷連尼甚至將祖維迪從歐聯名單中剔除，以騰出空位俾新加盟嘅邦尼，可見祖維迪喺隊中嘅地位已跌至谷底。最近祖維迪亦被傳將會以2000萬鎊轉投利物浦，相信佢可以滿足羅渣士對球員要擔任唔同角色嘅要求。喺曼城不被重用，或多或少都係讓祖維迪希望證明自己既推動力，不過可能讓利物浦卻步既係祖維迪既傷患問題，以往史度列治既教訓可能會讓利物浦去購買一個更健康既球員。

3. 賓迪基
三人入面，似乎賓迪基與利物浦走得最近，傳聞有指利物浦會交出3250萬鎊，用解約金條款逼阿士東維拉放人。賓迪基同上面兩位前鋒唔同，明顯係一個柱躉型中鋒，頂上功夫了得既佢，今季於舒活執掌阿士東維拉後，喺最後十一場英超攻入左十一球，當中包括對昆士柏流浪既帽子戲法同對熱刺既一箭定江山，係維拉護級成功既核心球員。

賓迪基只得24歲，仲有唔少既進步空間可以讓羅渣士去琢磨，但係壞處係：賓迪基唔係擅於幫波造波既前鋒，可能會影響到羅渣士既戰術體系，亦需要羅渣士重新訂下新戰術。


若然你鐘意「隨心寫足球」，不妨讚好本版facebook專頁，本版會為大家繼續送上好文:https://www.facebook.com/footballvoicehk
大家睇左延伸閱讀既文未？未就睇完呢篇快啲睇下喇，多謝支持~
原文,經編輯