五位曾經轉戰過西甲既英格蘭球員 精選 推薦

講到兩大最佳既足球聯賽，相信大家都會講話係英超同西甲。英超入面有好多西班牙人，現役既隨口噏都有卡蘇拿、施華、法比加斯等等，但係講到喺西班牙搵食既英格蘭球員各位讀者卻可能未必講得出太多，咁就等我地一齊黎睇下五個曾經轉戰過西甲既英格蘭球員啦：

1.連尼加 (86-89年效力巴塞)
喺贏得1986墨西哥世界盃神射手之後，連尼加以280萬鎊由愛華頓轉投巴塞隆拿。當時外界對連尼加既期望都幾大，但佢並冇令大家失望，佢效力巴塞第一季就於41場比賽射入21球，包括於一場西甲打比中大演帽子戲法，協助球隊以3-2擊敗皇馬。效力巴塞期間，連尼加贏得一次國王盃及一次歐洲盃賽冠軍盃。後來巴塞引入告奧夫，連尼加被逼轉打右翼，之後更失去正選位置，最後連尼加於89年轉投熱刺，重返英格蘭。

2.麥馬拿文 (99-03年效力皇馬)
在利物浦踢出自己既身價之後，麥馬拿文於99年運用波士文條例轉投皇家馬德里。佢好好把握呢次轉會既機會，成功於皇馬上位，努力令自己講得一口流利西班牙文既佢成為當時皇馬球迷既寵兒。呢位英格蘭翼鋒總共為皇馬上陣154場，射入14球，並交出33次助攻，亦為皇馬贏過兩次歐聯。不過其後多位世界級球員相繼加盟皇馬，麥馬拿文最後只有重返英超，加盟曼城。

3.碧咸(03-07年效力皇馬)
呢位史上其中一位最受歡迎球員於03年以3500萬歐元由曼聯轉投皇馬，當時碧咸既歡迎典禮有來自25個國家既500名記者到場參加，碧咸於皇馬名宿迪史堤芬奴手上接過23號波衫。碧咸效力皇馬期間，於朗拿度、施丹、費高等球星組成「6條A」，佢為皇馬上陣150場，贏過西甲冠軍，其後轉戰美職洛衫磯銀河。外界一直評論碧咸轉戰西甲之舉促進左西甲既發展。

4.活基治 (04-06年效力皇馬)
皇馬於04年以1340萬鎊簽入英格蘭守衛活基治，令外界大為吃驚。活基治加盟皇馬首季因傷患問題未為皇馬過任何一場比賽，而當佢第一次上陣時，佢就射入左一球烏龍球，同埋食左一面紅牌。2006年時，活基治終於確立到自己喺球隊既地位，但其後又因傷失去上陣既機會。2007年，活基治於一個西班牙網上投票中獲勝，可惜主題係：「21世紀最差收購」。

5.奧雲 (04-05年效力皇馬)
奧雲轉投皇馬前效力利物浦，係歐洲其中一個最強既前鋒。可是，奧雲轉投皇馬後卻不時只能以後備身份上陣，因為當時皇馬陣中有朗拿度及魯爾呢啲鋒線好手，奧雲既表現亦備受球迷同傳媒抨擊。奧雲效力短短一季後便被皇馬賣至紐卡素，效力皇馬的一年間，奧雲上陣45次，攻入16球。

好文推介:謝拉特—效力利物浦時既五大時刻

請支持「隨心寫足球」為大家繼續送上好文:https://www.facebook.com/footballvoicehk

原文,經編輯