五位可能會因迪比加盟而擔心一番既曼聯球員

隨心寫足球 於 09/05/2015 發表 收藏文章
筆者喺以往既文章曼聯新球員:你要知道迪比既五件有趣小事入面提及過,曼聯由PSV簽入左迪比。(想知迪比既大小事可以按入連結閱讀) 呢位21歲既新星可踢翼鋒、攻中,同埋前鋒,令大家可能產生一個疑問:迪比黎到曼聯之後踢咩位呢?

曼聯陣中絕對唔係冇球員選擇去組成一條鋒利既進攻線,但問題在於雲高爾一直搵唔到一係最佳方程式,例如未能令法卡奧同迪馬利亞發揮得最好,結果就係曼聯仍然要努力保持頭四位置,以季前既重量級收購黎睇,大部份球迷都認為佢地會坐穩前四。
相信雲高爾下季既目標將會更進一步,設為贏得聯寶冠軍,而購入迪比無疑可以製造隊中競爭,汰弱留強。以下係五位可能會被迪比威脅球隊位置既球員,佢地若想出任正選,就要更加努力保持高狀態喇。

1. 華倫西亞
由於後防兵源受傷患問題困擾,呢位厄瓜多爾國腳今季不時被雲高爾指派喺右閘位置上陣,以舒緩燃眉之急。但係數據上黎睇華倫西亞今季既表現其實未算頂級,雖然佢係曼聯今季陣中傳波第二多既球員,但係佢有時都會犯下失誤,包括喺足總盃八強回傳力度過輕,令阿仙奴既韋碧克有機可乘,射入致勝入球踢曼聯出局。

下季曼聯盛傳會買入修咸頓既右閘基尼,加上拉菲爾即將復出,華倫西亞可能要重返右翼上既競爭,但迪比踢翼位既能力無疑係比華倫西亞高,絕對有能力讓華倫西亞坐冷板凳。

2. 迪馬利亞
另外一位需要因迪比既加盟而感到擔心既翼位球員係英超史上最昂貴既收購—迪馬利亞。
呢位應屆世界盃亞軍轉到曼聯後,明顯踢唔番佢上季喺皇家馬德里既水準。上季佢製造出九十次機會同十七個助攻,雖然今季至今佢都有十個助攻,暫與史雲斯既施古臣並列第二,但佢喺球場上俾人有一種佢有啲迷失既感覺。而家迪馬利亞已經唔係雲高爾既首選球員,雖然曼聯唔會輕言放佢走,但明顯曼聯會方已經搵緊一個更好既選擇。

3. 艾殊利楊格
不論下季狀態火熱既係迪比抑或係迪馬利亞,艾殊利楊格都係會被趕入後備席既嗰一位。其實佢既情況同華倫西亞差唔多,面對住隊中後防隊友(盧克梳爾)復出,令到自己被逼離開翼衛既位置,變回翼鋒,但係翼鋒位置上又有星級球員在陣,機會無可否認會被剝奪。今季艾殊利楊格喺聯賽既場均入波、助攻同製造機會都未及迪比,心水清既雲高爾好自然會放棄艾殊利楊格。

4. 蘭尼
呢張名單中最有可能於今季結束後離隊他投既係葡萄牙翼鋒蘭尼。今季雲高爾決定以外借蘭尼至葡超士砵亭作為購入盧祖(或譯洛荷)既附加條件,得以睇到蘭尼喺雲高爾心目中既地位。

蘭尼今季喺士砵亭表現出色,但佢卻係一直心屬曼聯,佢話過:士砵亭嘅球迷叫我留低,但大家都知呢樣係一件難事,我同曼聯有合約在身,而我嘅野心亦不止於葡超。

但現實係,雲高爾對佢冇乜信心,加上右翼位置充滿競爭,蘭尼可能都要搵定自己嘅後路。

5. 雲佩斯
曼聯陣中最了解迪比銳利度嘅球員,非雲佩斯莫屬,因為荷蘭籍嘅佢地曾經喺2014世界盃呢個國際舞台上合作過。

今季雲佩斯踢唔出加盟初季嘅火熱狀態,只為曼聯射入十球,數量只係迪比今季嘅一半,加上又再次受到傷患嘅困擾。若然雲高爾將迪比放喺前鋒嘅位置,一定會不斷俾機會迪比上陣以讓佢吸收經驗,正步入生涯晚期嘅雲佩斯嘅地位一定會變得岌岌可危。

若然你鐘意「隨心寫足球」,不妨讚好本版facebook專頁,本版會為大家繼續送上好文:https://www.facebook.com/footballvoicehk
大家睇左延伸閱讀既文未?未就快啲睇下喇,多謝支持~

原文,經編輯

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→