伊雲奴域未獲新約遭多間球會覬覦，藍軍右閘明年或自由身轉會

英超頭兩輪伊雲奴域鎮守嘅車路士右路屢次成為對方嘅突破口，合同仲剩番最後一年嘅佢仲未得到藍軍嘅新合同，《每日郵報》稱佢引起左多間豪門嘅覬覦，出年一月起就可以同國外球會傾合同。
對史雲斯同對曼城嘅比賽中，伊雲奴域嘅表現遭到唔少質疑，英媒指出對曼城果陣佢鎮守嘅右路成為弱點，無暇應對史達寧同施華等人嘅輪番衝擊。新援巴巴加盟後，如果艾斯派古達番到右閘位置，伊雲奴域可能主力不保，另外藍軍仲求購緊愛華頓中堅史東斯，進一步威脅伊雲奴域嘅位置。
31歲嘅伊雲奴域合同仲剩番最後一年，而車路士嘅傳統係同30歲以上嘅球員一年一簽，目前佢地仲未同伊雲奴域開始續約談判，咁令佢深表擔憂，並影響自己嘅狀態，對曼城嘅最後兩個失波都可以睇到佢嘅身影。
《每日郵報》報導多間英超同歐洲豪門睇中左伊雲奴域，佢出年一月就能夠同國外球會談判並草簽合同。不過佢本人傾向於續約留隊，畢竟隊長泰利都係上季尾先得到藍軍嘅新合同，都曾經面臨同佢相似嘅處境。伊雲奴域宜家要做嘅就係同泰利一樣，保持好狀態，確保主力位置，咁先係續約談判中都有話事權。