法媒曝佩雷斯告知PSG願出售C朗，巴爾或因此迎來出頭天

皇家馬德里嘅佩雷斯，曾經以每年買一巨星赫赫有名。宜家，皇馬主席似乎要推行每年清洗一巨星嘅計劃。為皇馬效力25年嘅卡斯拿斯，將被逼離隊加盟波圖。而出年夏天，佩雷斯似乎又要清洗C朗。據《法國足球》報道稱，佩雷斯已經告知PSG高層，佢願意係出年夏天賣左C朗。
早前，佩雷斯曾經去左一趟卡塔爾，並見左PSG高層同幕後老板。當時西媒就懷疑，佩雷斯此行嘅目標係去洽談C朗嘅轉會。伊巴同PSG嘅合同將會係明夏到期，佢地需要係鋒線上進行重建。如今權威媒體《法國足球》，曝光左更多嘅細節。
據悉係今次會議上，佩雷斯的確同PSG高層商討左C朗未來嘅轉會可能性。佩雷斯告知PSG高層，佢有興趣係出年夏天出售C朗。以PSG咁有錢嘅姿態，出年好有可能會為C朗再砸出一個世界紀錄轉會費。當然，前提係C朗今季能夠保持巔峰狀態。
佩雷斯想清洗C朗？咁唔係咩新鮮事。C朗係卡爾德隆所決定引入，佩雷斯就一直想扶正自己買入嘅巴爾。而係兩人都最擅長踢左翼嘅情況下，扶正巴爾嘅唯一可能性就係賣左C朗。C朗出年2月就已經31歲，雖然文迪斯曾宣稱C朗40歲時會係班拿貝退役，但明夏將會係皇馬將佢賣出高價嘅最後機會。