山齊士拒投利物浦真相，因覺阿仙奴奪冠機會更大 精選

《每日電訊報》披露今夏利物浦對山齊士嘅報價比阿仙奴高300萬英鎊，但山齊士選擇左位於倫敦、奪冠機會更大嘅阿仙奴。山齊士本來係蘇亞雷斯嘅理想代替者，但利物浦未能藉住呢個黃金機會擊敗阿仙奴，證明佢地重新崛起嘅雄心。
今夏從巴塞轉投阿仙奴嘅山齊士各項賽事射入15球，被譽為「阿仙奴最粗大腿」，而佢都曾經係利物浦目標。蘇亞雷斯加盟巴塞後，紅軍視山齊士為蘇七接班人，佢地嘅報價比阿仙奴嘅3500萬英鎊仲要高300萬，但山齊士決定加盟位於倫敦嘅阿仙奴。倫敦對一啲外籍球員的確好有吸引力，山齊士表示佢要同前皇馬球員奧斯爾並肩作戰，因為咁樣奪冠嘅機會更大。
山齊士同利物浦係絕配，數據上黎睇，佢效力利物浦可能比阿仙奴更合適，佢嘅態度同鬥志令佢融入羅渣士嘅高壓打法。簽唔到山齊士，利物浦都應該簽下另一個大牌，必要用嘅錢就用，但佢地無。利物浦嘅策略好明顯，決定用數量加強陣容深度，俾羅渣士培養佢地。事實上紅軍複製左熱刺8500萬英鎊出售巴爾後嘅策略，即使係呢種方法都係失敗。