洛賓效忠拜仁否認加盟曼聯，盛讚雲高爾哥帥最佳 精選

荷蘭球星洛賓稱讚雲高爾同哥迪奧拿係佢合作過之中最佳嘅主帥，勝過摩連奴，但佢肯定會繼續留响拜仁效力，堅決否認加盟曼聯嘅傳聞。繼卻奧斯同梅拿之後，曼聯再次被一名拜仁球星公開拒絕。
荷蘭主帥雲高爾將會係世界杯後正式接手曼聯，而同紅魔傳出緋聞嘅荷蘭國腳有好多，包括拜仁飛翼洛賓。然而洛賓追隨雲高爾加盟曼聯只係媒體或紅魔嘅一廂情願，岩岩同拜仁續約嘅洛賓堅決否認。拜仁岩岩先勇奪德甲同德國杯雙冠王，而洛賓就當選左賽季最佳球員，若加盟動盪期嘅曼聯，佢保唔保持到係拜仁嘅狀態仲好難講，更何況紅魔下季踢唔到歐聯，呢個先係重點。
 洛賓同荷蘭《電訊報》指出：「加盟曼聯唔係我嘅選擇，我將留响拜仁，到此結束。我無法想像點解拜仁會放我走，我岩岩先續約，而且我地對彼此都好滿意。如果我唔開心，情況就唔同講法。我同雲高爾一齊係拜仁度過左美妙嘅時光，佢同哥迪奧拿係合作過嘅最佳主帥。我感覺良好，所以會留响拜仁，轉會曼聯嘅機率係零。」
 09-10賽季雲高爾曾率領拜仁奪取德甲同德國杯雙冠王，歐聯殺入決賽，但輸比國際米蘭。洛賓都响果個賽季大放異彩，歐聯8強作客絕殺曼聯，助拜仁以淨勝球優勢晉級。上季曼聯同拜仁再次係歐聯8強相遇，而洛賓又係第二回合入波，佢可以算得上係紅魔剋星。洛賓曾效力過車路士同皇馬，而同佢共事過嘅名帥有摩連奴、哥迪奧拿、雲高爾同希歷基斯等，摩帥第一次執教藍軍時兩奪英超冠軍，希帥曾帶領拜仁於2012-13賽季勇奪三冠王，但洛賓仍然認為雲高爾同哥迪奧拿先係最佳。