曼城或付巨額違約金強搶卡雲尼！ 精選

曼城鋒線無力既病有望係今個夏天解決！拿玻里鋒霸卡雲尼既經紀人日前表示，佢唔敢保證卡雲尼下個賽季會唔會仲係拿玻里，並且指出曼城有能力支付呢名烏拉圭射手既毀約金，而《太陽報​​》指出，係呢件事之前，文仙尼必須清洗佢現有既四大前鋒入面既一個！

曼城係上年夏天既雲佩斯爭奪戰中輸左俾曼聯，其實從牌面上黎講，阿古路+迪維斯+迪斯高+巴洛迪利既實力並唔俾雲佩斯+朗尼+小豆+維碧克，甚至仲可以講係勁啲，但係係英超賽程過左一半之後，眼見狀態火爆既雲佩斯率領曼聯將曼城甩下七分既距離，文仙尼最近多次抱怨佢既四大前鋒都唔識入波，甚至仲話要改打無鋒陣！挽始終係挽，但係唔難睇出文仙尼打算購買新前鋒既諗法。係經過上個賽季歐聯小組賽卡雲尼係拿玻里兩場對曼城既時候狂入三球之後，呢名烏拉圭鋒霸早就多次進入曼城既轉會名單，雖然拿玻里啱啱同卡雲尼續約到2017年，但係拉奧拉既一番說話就令所有對卡雲尼感興趣既球隊開始打起自己既算盤！
麾下擁有巴洛迪利、伊巴謙莫域等球星既著名經紀人拉奧拉話：“宜家卡雲尼會留係拿玻里，但係一旦祖雲達斯捲土重來，我唔肯定會發生咩事，我肯定會有球隊願意俾佢既違約金，但係世界上只有五支球隊俾得起佢既轉會費，巴塞、皇馬、曼城、車路士同巴黎聖日耳門，如果你夠聰明既話，你先知卡雲尼下個賽季係邊度踢波。”
據悉，卡雲尼新合同入面既毀約金高達5100萬鎊，拉奧拉並無講錯，的確得五支球隊先有能力俾佢既轉會費，而宜家拿玻里只係排係意甲第五，咁令到新賽季20場入20球既卡雲尼非常不滿，亦即係話，如果今個夏天有球隊出到5100萬鎊，卡雲尼就可以唔洗徵求拿玻里既同意就轉投新東家！

如果曼城打算收購卡雲尼，就一定要先將宜家有既四大前鋒賣走一個，從宜家既情況黎睇，好有可能就係長唔大既巴洛迪利，雖然日前文仙尼仲強調曼城唔會賣走佢，但係話哂迪維斯+阿古路既阿根廷組合威力好大，迪斯高最近又係咁入波！