朗尼下星期同莫耶斯攤牌，走人只會選擇留係英格蘭 精選

隨住曼聯集合備戰新賽季既日子一日日接近，朗尼同紅魔新帥莫耶斯談判攤牌既日子都終於到啦。《太陽報》同《鏡報》同時披露，朗尼將會係下星期曼聯出發踢夏季熱身賽前同莫耶斯攤牌，如果傾唔掂，朗尼將會轉投車路士或者阿仙奴。
《太陽報》指出，曼聯原定係7月3日集合開始夏季集訓，而莫耶斯都將會係下星期一結束假期正式開始執教曼聯既工作，到時佢就會同佢曾經一手提拔入愛華頓一線隊既朗尼攤牌。據稱，車路士同阿仙奴都有意收購呢名27歲既英格蘭前鋒，但係朗尼想係做出最後決定前同莫耶斯傾一傾，確定佢係奧脫福仲有無將來。
而《鏡報》就指出，朗尼至今仍然俾上季費sir棄用感到好受傷，而且佢都唔承認費sir上季公開宣稱佢已經提出轉會申請。宜家，朗尼想要新主帥莫耶斯親口話俾佢知自己既位置，因為佢仍然想留係曼聯。
但係如果談判破裂，朗尼將會接受佢無唔走既事實。《鏡報》披露，甚至費sir都已經指出，宜家係賣朗尼既最佳時機，因為到今年10月，朗尼就年滿28歲，而且佢既合同只剩番兩年，如果唔續約到出年呢個時候，朗尼既身價將會嚴重縮水。不過，係曼聯無將朗尼放上轉會市場之前，車路士同阿仙奴都無權同朗尼接觸。
各方面既消息都顯示，如果一定要離開曼聯，朗尼更傾向留係英格蘭。雖然最近有關朗尼轉投皇馬既指數大降，而法甲兩新貴巴黎同摩納哥都對小胖虎視眈眈，但係如果小胖真係走人，佢既首選都係加盟車路士同阿仙奴。《鏡報》就指出，曼聯都唔情願將朗尼賣俾奪冠競爭對手，如果非要係車路士同阿仙奴之間選一個既話，曼聯更加寧願將小胖賣俾雲加。