曼城五大前鋒人選頂替巴神！ 精選

巴洛迪利終於離開左曼城，如無意外，應該可以參加下個賽季歐聯既曼城肯定會再買一個新前鋒，話哂只係靠迪斯高、迪維斯同阿古路係無辦法滿足三線作戰需要，而從各地聯賽傳出黎既消息得知，曼城都早就做好左準備！

之前英媒就多次披露，為左達到歐足總公平競賽法則要求，壓縮開支既曼城唔會額外撥款俾文仙尼係冬季買人，收購新前鋒既前提係必須賣走原有既前鋒。宜家巴洛迪利既離開幫曼城帶黎左2300萬鎊既進賬，文仙尼總算可以光明正大咁收購新前鋒。而睇住死敵曼聯依靠上年夏天搶走雲佩斯之後係新賽季一路領先，憋住一口氣既文仙尼肯定打算買番一個唔俾雲佩斯差既新前鋒。《鏡報》披露，係決定賣走巴洛迪利之後，曼城方面就已經打起左巴塞鋒霸維拿既主意。雖然紅藍軍啱啱拒絕左阿仙奴既報價，但係曼城方面仍打算係轉會窗口關閉前作最後既努力。價錢方面，曼城準備為呢名因長期傷病失去主力位置既西班牙前鋒報價1500萬鎊，而目前擔任曼城體育經理既前巴塞高層都會將動用佢既關係挖老東家牆角！《鏡報》仲披露，即使巴塞唔肯賣維拿，曼城方面都會同意租住佢半年既第二選擇，話哂今個賽季曼城只剩低英超同足總杯兩項比賽，無新前鋒既關係都唔大。另外，曼城仲瞄準左皇馬前鋒希古恩，而咁亦都係今年夏天既事。
當然，之前同曼城發生最多轉會傳聞既係拿坡里神鋒卡雲尼。根據意大利媒體報導，巴洛迪利轉投AC米蘭即將引發AC米蘭、曼城同拿坡里既連鎖交易，即係巴洛迪利加盟AC米蘭，艾沙拉維轉投拿坡里，而卡雲尼就跳槽曼城。但係傳聞卡雲尼更加渴望加盟皇馬，加上佢高達5100萬鎊既毀約金，呢筆交易恐怕唔易搞掂，但係如果卡雲尼去皇馬，正如以上所述咁，曼城更加有機會簽下皇馬既希古恩。
如果收購卡雲尼失敗，曼城都仲有其他選擇，包括馬體會既法卡奧同巴西小天王尼馬，但係皇馬同車路士都對法卡奧虎視眈眈，曼城恐怕都好難得手，據稱佢既身價高達5000萬以上。而尼馬既去留依然係個謎，但係山度士早就已經表態，即使尼馬轉會都只會係夏天，曼城既競爭對手包括皇馬、車路士、巴塞同拜仁等等。