巴神獲評英超最超值引援，紅軍買佢只用一半身價

巴洛迪利1600萬鎊加盟利物浦係歐洲足球壇嘅大新聞，而專業足球分析機構指出佢係今夏英超最超值嘅引援，因為佢係市場價值本應高達3000萬鎊。
黎自瑞士CIES足球觀察機構分析家根據歐洲足球壇球員嘅年齡、合同、位置、表現同國家隊經驗，統計出今夏轉會市場上球員嘅「市場價值」。結果表明利物浦新援巴洛迪利係英超最超值球員，佢嘅市場價值本來係3000萬鎊，但利物浦簽佢只係用左1600萬。有人更指出巴神值4500萬！
另一名超值球員係由馬體會轉會至車路士嘅迪亞高哥斯達，佢嘅市場價值本應係4000萬，而藍軍只用左3200萬，而英超前兩輪佢都有入球，的確物超所值。但並唔係每個球員都物超所值，例如車路士5000萬鎊高價賣俾巴黎聖日耳門嘅巴西中堅大衛雷斯，CIES認為佢只值2400萬，藍軍應該要偷笑。
無論如何，巴神超唔超值仲要睇佢係球場上嘅表現。日前係訓練中心嘅巴神心情唔錯，同新隊友打​​成一片，有講有笑，盧卡斯抱住佢講笑，非常輕鬆愉快。巴神回歸英超後每個動作都成為焦點，之前佢好唔容易套上一件訓練背心都上左報，所以佢場上嘅表現更會被置於顯微鏡下。