有些球員唔算係big name, 但你會記得他的名字：就算你不是經常看他的比賽又或者你不是那隊的球迷，你都仍然會記得這個球員....
1. 實不相暪，我到今時今日都仍未分得清楚拉斐爾同法比奧個樣，話明Twins 就當然難分，就好似望住鏡裡的自己一樣，邊有分別啫？就連當年「湊」大他們的費Sir 都講過搞唔清邊個係拉斐爾，邊個係法比奧。（我唔係曼迷，分唔清楚幾咁閒，但費Sir係主帥喎，不過佢都可能係講笑啫...)
2. 聽說達施華兄弟加盟曼聯時有段故，而這段故跟香港有關。當年達施華兄弟跟富明尼斯來港踢青年邀請賽時得到曼聯球探賞識，然後引薦到曼聯試訓到最後成功加盟。所以傳媒話佢兩個係在香港地踢波時被發掘的說法不無道理，只係有小小誤導以為係踢香港球會囉。
3. 提起拉斐爾，好難唔提埋達施華......梳，係法比奧先岩。他倆總令我想起以前七小福中的尼維尼兄弟。大家都係兄弟兵，又係踢曼聯，又係一個左閘一個右閘，難免令人將兩對兄弟兵連上關係。
4. 尼維尼兄弟中，大佬加利仔際遇比細佬菲蠟仔好得多，至少大佬能夠係曼聯踢到退休，但細佬老早就過咗去愛華頓（在愛華頓也是老臣子）；達施華兄弟相反，細孖拉斐爾比大孖法比奧得到更多機會。費Sir 年代的曼聯，加利仔係鐵膽右閘，但年時已高接近退位讓賢，年輕的拉斐爾自然能夠上位,當時更被費SIR點名做下一個尼維利，甚至認定他能像加利仔一樣成為曼聯傳奇；相反大孖法比奧無咁好彩，一來好易受傷，二來左閘位置有正值黃金時期的前鋒華坐陣，法比奧機會少之有少，所以他代表曼聯沒太多次，其他時間都過住外借生涯，2014年仲永久轉會到卡迪夫城。
5. 曾經有人講笑咁講，如果拉斐爾受傷，可以直接搵法比奧頂上，咁就可以慳一個換人名額；又或者拉斐爾唔得閒出場可以搵法比奧做替工;而隊友又唔知分唔分得清落場個位係拉斐爾定法比奧？不過法比奧走咗之後，呢啲笑話就無得再笑了。
6. 我不是曼迷，但我好記得拉斐爾為曼聯入的第一球，因為那場比賽對手是阿仙奴。2008年阿仙奴主場對曼聯，拉斐爾後備入替加利仔，在89分鐘禁區左腳拉弓，皮球擦柱入網，但可惜入球來得太遲，最後曼聯作客輸1：2，就係咁，拉斐爾帶著小小開心又有小小失落的感覺完成自己在曼聯的第一個入球。（但我開心嘅，阿仙奴贏咗曼聯喎）
7.但講到最深刻的，一定係費Sir當年足總盃8強對阿仙奴（ 又係你呀阿仙奴）時擺出的「7後衛」怪陣，達施華兄弟分擔左右兩翼，嚴如立花兄弟。人人都R 爆頭費Sir舉動，點知呢個怪陣最後係請阿仙奴食了兩隻光蛋。當時第一個入球由達施華兄弟發動，最後大孖法比奧埋齋。(作為阿迷，只有說不出的失望，但那時都慣慣地...）
8.時代永遠不會一成不變，費Sir 的曼聯時代已經過去兩年，經歷過The Chosen One同敢帥調整後，曼聯陣容已不如費Sir年代般限米煮限飯（費Sir勁在陣容不算十分華麗都能贏到英超冠軍)，今天曼聯已經多了好多張新臉孔，甚至比費Sir年代多了更多Big name。回想過去，昔日仍是費Sir麾下的尚有伊雲斯、史摩寧、華西、小豆、羊、鍾斯、迪基亞等等，但講到資歷較深的就只有朗尼（2003年加盟）和卡域克（2006年加盟)和拉斐爾達施華（2008年），但今日效力了8年的斐爾也宣佈離隊他投，轉到法甲里昂。
9.昔日費Sir一手提攜的球員已經一個一個離開了曼聯，看似是雲高爾「趕走」，但其實即使雲高爾不趕走，這也會是將來的事。不是教練或球會管理不善，而是這個是不能避免的事，任何球隊都要經歷改朝換代的一朝，終有一天陣容會面目全非，但舊的離開總會有新的頂上，也許當日那個黃毛小子也會成為將來的傳奇，人生漫長，任何事都說不定的。
10.拉斐爾將在里昂穿著20號球衣，他說選擇20號原因是為紀念曼聯贏得了20個聯賽冠軍，而當時的他也是冠軍成員之一。
11.雖然人已離開了曼聯，但心裡仍然對效力了8年的球會表示忠誠，即使不能效力到退休，也不會忘記那些年的美好日子。那動人時光，未必地老天荒，雖然唔是曼迷，但見到任何球員都有一種「飲水思源」（唔撚係on9蔣個種飲『東江』水要思『鉛』個隻）的態度和不捨球會之心，其實都會感到一絲絲窩心和感動。
12.容許我跟你說聲：「真曼子」，可以嗎？
足球說故事@https://www.facebook.com/Footballtellstory
請按此登錄後留言。未成為會員? 立即註冊