得罪講句，連安察洛堤呢啲咁識擦老細鞋嘅教練都搞唔掂佩雷斯，就知道問題核心唔係皇馬班球員，而係個主席。
佩雷斯無耐性又麻煩人所皆知，呢10幾年黎有邊個教練係教得長？難得肥安唔介意under係呢條濕鳩之餘，仲要對老闆千依百順。老闆一句話：「我要買巨星！」安帥絕對唔會say no，仲會拍曬心口同老闆：「得，只要老闆鍾意就得啦！」「喂，人患喎？岩唔岩排陣架？」安帥：「得喇，唔洗同我擔心，排陣嘅野我自然會諗掂佢，總之佩雷斯想買邊個，想點出，我幫你出撚曬佢，老細想點我就點，絕對唔會丟老闆臉！」
而安帥最值錢地方係佢識得係最適當時候出黎幫老細擋刀擋槍。當日全世界都屌緊佩雷斯賣走奧斯爾時，作為打工仔嘅安帥即刻出黎幫老闆護航，仲開曬記招同記者講：「奧斯爾係我趕走嘅！」成隻死貓食到正，只係打工仔嘅你敢唔敢？
但安帥話佢敢！你可能話佢識擦鞋，無錯，佢絕對係個擦鞋仔，但擦鞋同時仲做到野俾老闆睇，交到成績出黎，第1年上任即刻幫你拎第10座歐聯冠軍，同年亦拎埋西班牙國王盃，歐洲超級盃同世界冠軍球會盃，擦得合理之餘亦無甚壞處，醒目也。
好聽啲，佩雷斯係高要求；難聽啲，係麻煩又濕鳩。
不過啊，食得鹹魚抵得喝，一但交唔出咩成績，任你以前立下過多少功臣同功勞，佩雷斯都一樣會叮走你。無聯賽冠軍？叮！無歐聯？叮！四大皆空？叮叮叮叮叮！或者當日安帥知道自己歐聯出局後，自己嘅職位已經凍過水，這刻誰還記得安帥係2014年帶領皇馬係各項賽事取得22連勝佳績？而由高峰跌到谷底，講緊嘅只係半年嘅事....
皇馬俾人嘅感覺係祟尚勝利，追求大牌球星，基本上每一隊波都係有呢樣宗旨，但對於皇馬，呢份勝利係絕對唔容許落係對方身上，任何事都要贏，要做長勝將軍，但足球嘅野，點可以次次都係你贏呢？但佩雷斯就話：「我買咗世界上咁好既球員都贏唔到？我唔信！你教唔好就係你問題，你走！」輸波好聽啲嘅就係丟球會臉，難聽啲講就係輸唔起。而佩雷斯眼中，無咩人係非賣品，一個人有絕對權力就會放肆，錢？我大把，無你，我無野架，自然有人仆住過黎坐呢個位。記住，你係打我份工架渣！所以，皇馬炒教練已經唔係咩新鮮事，但球迷同樣會覺得驚訝，驚訝在點解要咁快炒教練？
一個教練，除咗領軍，仲要用佢嘅腕力去鎮壓隊內一些黨派，達致上下一心；而教練最重要嘅係同球員有交流，知道球員點諗，而球員亦知道球練想點踢，呢啲就係默契。經常換新帥換新兵，岩岩好建立到默契，又突然被瓦解，循環不斷。贏波，唔止係靠球技架佩雷斯。而問心，皇馬俾到球迷有「上下一心」嘅感覺係幾時呢？
佩雷斯不斷追求美好嘅將來，但從來唔識長遠去諗，只知道有錢就可以有美好將來。但將來，係一段長時間，唔係可以用短時間去建立，佩雷斯一日都保持佢嘅無耐性嘅處事方法，一日都唔會有美好將來。而我覺得其實皇馬而家最需要唔係搵邊個做教練，直情由佩雷斯自己教番皇馬喇！但佩雷斯會擺出老細款答你：「你都on9嘅，錢我大把，洗撚我做啊？」而當記者會上記者問佩雷斯：「安察洛堤缺少咗啲咩，佢做錯咗咩？」佩雷斯回答：「我不知道。皇馬主帥這個位置，要求非常高。」你就知道，呢個位，除咗佩雷斯，應該就無咩人可以坐到。
我從來唔討厭皇馬，我討厭嘅只係背後話事個個佩雷斯。好老闆，係唔係只需要搞好財政方面，就叫好老闆呢？
足球說故事@http://facebook.com/footballtellstory
請按此登錄後留言。未成為會員? 立即註冊