【復甦神鋒交叉點】迪亞高哥斯達 vs 朗尼

波事春秋 於 06/02/2016 發表 收藏文章

【復甦神鋒交叉點】迪亞高哥斯達 vs 朗尼
星期日車路士大戰曼聯,賽事焦點落喺兩軍狀態大勇嘅前鋒哥斯達同朗尼身上。呢兩位射手今季經歷相似,上半季表現強差人意之後,近排一齊大爆發,令今場大戰更加激烈。所以,以下將以不同角度分析兩位球員嘅表現:

【破門】前鋒第一樣野當然講入波,哥斯達現時以8球稍稍領先朗尼7球,呢個數據喺頂級球會嘅前鋒黎講只屬中等,呢個表現亦係兩隊今季表現未能達標嘅原因之一。不過兩人上半季廣受批評之後,下半季突然入球如麻,由拆禮物日起計,哥斯達英超6場錄得5入球2助攻,無獨有偶,朗尼亦喺7場聯賽斬獲同樣數字(5射2傳),狀態明顯上升,今仗絕對會成為兩軍重點佈防嘅對象。
【射門】雖然兩人入球成績叮噹馬頭,但比賽中射門嘅分佈相距甚遠。兩位球員場均射門次數接近(2.51及2.72球),但其中哥斯達有94%射門都係禁區內施射,相反朗尼竟然只得46%屬於禁區內起腳,亦即係話朗尼超過一半射門係禁區外遠射,咁係咪超過一半入球都係遠射呢?答案係朗尼入7球之中只得1球係遠程炮。所以朗尼如果可以減少回報率唔高嘅遠射,好似哥斯達咁專喺禁區內搵食,分分鐘表現更上一層樓。

【傳送】朗尼錄得咁多遠射,可能同佢鍾意墮後組織有關。近年朗尼有轉型跡象,即使出任單前鋒,亦傾向回後較炮,參與組織多過做隻禁區之狐。所以朗尼場均傳球比哥斯達多出一大截(29對22),事實上唔係哥斯達傳波少,而係朗尼喺全英超前鋒之中傳送數字冠絕同儕。而製造入球機會上,朗尼場均造出1.6次機會亦比哥斯達多出一半之多(1次),但至今兩人同樣錄得3次助攻,反映曼聯隊友比較算係「大嘥鬼」。

【對抗】哥斯達雖然不善盤扭,但每場成功過人次數竟比高速嘅朗尼高出1倍(1.4次對0.6次),事實上兩位鋒將過人嘅成功率都喺35%左右,數字反映哥斯達只係嘗試得比較多,相反朗尼就傾向遇到守將嘅時候傳波比隊友。犯規數據上,哥斯達出名茅躉王,所以場均犯規次數1.8次當然遠比朗尼1次為多,但同樣被對手侵犯次數亦拋離朗尼(1.8次對0.4次),如果以被侵犯次數減去犯規次數(淨犯規得益率),哥斯達0次竟然比-0.6次嘅朗尼「回報率」更高。

1個月前兩軍奧脫福對陣,朗尼未能突破泰利同蘇馬嘅防線,而哥斯達則因為停賽錯過同今季大熟大勇嘅「大佬寧」大鬥法嘅機會,士別三日,兩位前鋒都重拾昔日當家射手嘅感覺,今仗絕對係佢地證明自己嘅精彩對決。

【鍾意我地嘅文章? 黎Like波事春秋Facebook專頁啦!!】

Facebook專頁連結: https://www.facebook.com/footballmatter/
標籤: 波事春秋  英超  曼聯  車路士  朗尼  哥斯達  足球  

留言


請按此登錄後留言。未成為會員? 立即註冊
    快捷鍵:←
    快捷鍵:→