半夜睇波呢啲「男人的浪漫」，其實代價好沉重，有冇諗過你嘅身體都會好似踢完波嘅俄羅斯球場草地一樣，不知不覺間變得滿目瘡痍，成個人殘晒？冇辦法啦四年一度，嚟到最後階段梗係要睇盡佢，不妨留意以下五點，搶救你嘅「睇波後遺症」：
1. 開波前最佳熱身係……
捱完夜之後就算瞓到日上三竿，都一樣補唔返，到底點解？簡單講，好似史達寧咁，應該交波你就射，應該射波你就扭，唔適當時候做唔適當嘢，梗係唔掂啦。由中醫嘅角度去睇，晚上瞓覺先有效為身體進行陰陽交替，所以平時想捱夜睇波，建議喺晚上11點至1點呢個中醫學上陰陽交替嘅時間瞓個「子午覺」，將傷害減到最低。當然啦，今次決賽係11點開波，冇辦法瞓「子午覺」，不過食飽飯開波前，盡量眠一眠都有幫助。
2. 說話可以亂講，嘢唔可以亂食
睇波要睇得爽，好多球迷都一手薯片一手啤酒，一路狂插愛隊，刺激性食物配合滾動嘅心情，中醫角度喺非常傷身！所以一定要好似摩迪咁，盡量控制好節奏、心情；試一次用水果代替零食，飲多啲水，睇完波要復原就事半功倍嘞！
3. 睇波都會受傷？
尼馬就話被風吹到都會受傷碌地姐，有冇諗過睇波嘅你隨時都可能會受傷？唔係誇張。除咗坐姿唔好會整親或者坐得太耐氣血運行不良之外，捱過夜嘅一定知道對眼都好傷！要復原，坐得太耐記得起身鬆下筋骨，搵機會行兩步，減低腰痠背痛、四肢浮腫；講到對眼，睇完波日頭眼攰眼乾就做吓「眼球操」：以上下左右方向慢慢打圈轉動眼球，另外仲可以按摩眼內角稍上方凹陷處嘅睛明穴，同埋隨身攜帶眼藥水滋潤眼睛。咁樣就算睇完英格蘭都唔會眼火爆啦！
4. 你的樣子如何，你的日子也必如何
捱夜會導致面部出油生暗瘡，酒精飲品又會令身體缺水，加上愛隊出局俾人抽水，瞓醒已經成面暗瘡，起身成隻喪屍咁，有女朋友嘅會俾女朋友鬧，冇嘅就識唔到女，返工嘅就嚇死老闆同事……
要快速復原，其實易過英格蘭入決賽。首先，記得用含茶樹油成分嘅洗面乳洗一洗面，就可以平衡多餘油脂，有效抗痘；然後，仲要加埋保濕雙管齊下，皮膚有充足水份先唔會出油！夏天用埋冰涼清爽嘅保濕凝露，鎖緊水份之餘又唔會太黏膩。一於每晚喺半場休息時或臨瞓前抽一分鐘出嚟洗面保濕，幫皮膚建立嚴密嘅防守，終極控油！以下推薦兩款適合夏天用嘅產品，萬寧、屈臣氏都有得賣：
Step1: 曼秀雷敦草本控油潔面乳$76.4
含茶樹油潔淨配方，護理暗瘡皮膚，平衡多餘油脂，高效抗痘，擊退痘印。
Step2: 曼秀雷敦高保濕冰爽凝露$116.9
2018夏天全新產品，含密羅木葉提取物，膚感極冰涼清爽，迅速補濕和鎖緊水份
5. 賽後下火必殺技
之前睇到阿根廷、英格蘭咁嘅表現，當然要下火。唔好再迷戀「鬼佬涼茶」，睇完決賽第二朝記得飲番杯傳統涼茶，打番好個底，復原冇難度！不過記得睇番身體情況而定：如果有易熱、面油多等癥狀就可能係實火，涼茶可以幫到手；但如果係口乾、皮膚乾等癥狀就可能係虛火，咁就唔好亂飲涼茶，否則可能會越飲越虛！
請按此登錄後留言。未成為會員? 立即註冊