2022年 大家都希望阿根廷贏世界盃冠軍, 2024年…一切都改變 精選

2022年
大家都希望阿根廷贏世界盃冠軍。

2024年美斯訪港失場，盛事變憾事。

安素慶祝歌曲涉嫌種族歧視同性向.歧視。

香港嘅阿根廷球迷舉辦巴士巡遊，引起關於身份認同嘅討論，甚至討伐。

短短一年幾嘅時間，大家對阿根廷嘅印象，可以話翻天覆地。

小弟上年去西班牙嘅時候，問過帶團嘅當地人，佢哋好支持自己地區嘅球隊 (喺較低組別聯賽)，但同時亦支持頂級聯賽球隊 (大多數係巴賽/皇馬)。

講到呢度，有人就會話：「球會同國家隊唔同吖嘛」，用文化、語言、經歷、地區做論據，話小弟離題。
其實，球會背後，都係呢啲野：
皇家馬德里從前象徵權力同壟斷
巴賽隆拿代表加泰羅尼亞人成為「地上最強」
利物浦曼聯之所以係宿敵，係同超過百年以來兩個城市發展之爭有關...

身在地球另一邊嘅香港人，有幾多人自己或者父輩甚至祖輩，親身經歷過球會發展背後嘅軌跡？

我哋之所以作為球迷，小弟相信係因為，精彩嘅畫面、球迷嘅氣氛、深刻嘅故事...呢啲隔住個mon都feel到嘅嘢而入坑。

從前有：
比利三奪世界盃
馬勒當拿上帝之手後以一敵六射入絕世金球朗拿度、朗拿甸奴、李華度演繹森巴足球
意大利演繹防守極緻
德國嘅日耳曼足球
92年歐國盃丹麥童話
曼聯99年歐聯奇跡(兩分鐘內逆轉拜仁慕尼黑)
04年歐國盃希臘神話
05年伊斯坦堡之夜(利物浦落後三球下反勝AC米蘭)
柏金、亨利年代嘅阿仙奴
地上最強嘅巴賽隆拿
西班牙沙維、恩尼斯達連同整隊演繹行雲流水嘅足球
C朗時期嘅皇家馬德里
16年英超李斯特城奇跡奪冠
同年歐國盃冰島擊敗英格蘭
2024年初香港打入亞洲盃決賽周......

如今，美斯與阿根廷嘅追夢故事，即將迎來尾聲。

雖然冇親身經歷過阿根廷經濟陷入低谷，但小弟都以足球作為寄託，支持阿根廷係因為佢地曾經係「亞軍廷」，而我相信「宿命」係可以打破嘅，哪怕曾經無人睇好。

同時，小弟亦認為，佢哋嘅歷史值得傳誦落去。如今迎來時代嘅尾聲，係時候做番條片，將值得傳頌嘅歷史，記低佢。