阿根廷圓夢九個月｜情懷不變

當地時間嘅琴日，香港時間嘅今日（9月19日），阿根廷圓夢，咁就九個月。
九個月，足以容納千變萬化…

球王美斯已從頂級舞台中，漸漸功成身退，離開吵鬧嘅巴黎，去到邁阿密都頗為忙碌。由地標戰開始，44日出戰11場比賽，平均啱啱好四日一場。對於36歲嘅老將而言，負擔唔細。

天使迪馬利亞溫馨回家，相隔十三年再為賓菲加效力，級數猶在。今季暫時踢六場，入五球有兩個助攻。

祖利安喺如日中天嘅曼城，漸漸承擔更多，今季英超暫時踢足每一分鐘。

安素同利辛度，喺英超面臨大堆考驗，車路士有排夾，曼聯有排從傷兵潮恢復。
老麥進入Big6行列，適逢利記中場換血，佢就成為中場核心。

基斯頓羅美路喺熱刺捱咗咁耐，隊波終於走上正軌。

九個月前將阿珍送上冠軍寶座嘅蒙迪亞，今夏去到諾定咸森林，希望順利。

不過，有啲嘢都係不變嘅，美斯依然能單天保至尊，但估唔到嘅係，最近對厄瓜多爾換出後，佢都坦言：「攰啦」，去到玻利維亞退居板凳，默默支持一班兄弟。美斯嘅比賽，真係睇一場少一場。

由「球王追夢隊」到你同我，經歷得愈來愈多就梗嘅，變化愈來愈多都係梗嘅。不過，經歷咩都好，自己或者環境變化成點都好，曾幾何時無數人夢想嘅畫面成真，無論時光點樣飛逝，永遠都值得回味，希望睇住阿珍相隔三十六年再贏世界盃，睇住美斯經歷高山低谷再捧起大力神盃嘅情懷，始終不變。