利物浦演繹韌性！踢少一人之下反勝紐卡素！ 精選

🔴《韌性》
早段黃牌，早段犯錯而落後，緊接而來雲迪克被逐。
長時間踢少一個，面對歐聯分子紐卡素，應該冇人期望會反勝啩？

利物浦就極速適應變遷，並選擇專注當下力求反彈。

高普決定先以高美斯入替迪亞斯，因為佢知道利記難免退守。
眾將臨近絕境下顯得更加專注，有落力冇氣餒。
少有出場嘅馬迪普同高美斯，踢出近月之中最穩陣嘅表現；
阿諾冇俾哥頓繼續爆破；
羅拔臣延續鐵漢本色；
蘇保斯拉、麥亞里士打、加寶前仆後繼；遠藤航表現盡責；
20歲中堅昆沙予人驚喜；
艾利臣化身守護神；
利記總算頂得住冇再失波；

去到尾段，具創造力嘅艾利洛，以及銳利嘅反擊手祖達同紐尼斯先後入場。
祖達多次引領反擊，劣勢下敲響新城堡大門。
紐尼斯兩次機會，同樣係右輔位半單刀，一次係把握對方中堅保文失誤而嚟，一次係沙拿嘅直線。
出名把握力差嘅紐尼斯，喺關鍵時刻，用兩腳精準嘅射門，
令聖占士公園球場主場球迷鴉雀無聲！
帶領利物浦所有人一吐污氣！
讓球迷刮目相看！
唔止對佢，而係對今季面貌煥然一新嘅利物浦！