2023女子世界盃十大回憶 (上) 精選

🌎🌍🌏⚽️🏆👑
今屆喺澳洲同紐西蘭舉辦嘅女子世界盃決賽周，係首次有32隊參賽，同半年前喺卡塔爾舉行嘅男子世界盃一樣。除此之外開幕禮、閉幕禮、比賽出場同頒獎禮等場面，亦同男子世界盃相似。賽事方面，由世界盃到洲際比賽、球會聯賽同盃賽……男子有嘅，女子都有。
至於戰術、技術同比賽強度方面，以至薪酬同資金方面，雖然女足同男足之間仍有些少距離，但依家係喺進步過程之中，尤其係技術方面。西班牙喺決賽對英格蘭，已表現出接近「地上最強」巴塞隆拿嘅面貌。日本反擊極其銳利，觀賞性不下於男子足球。

今屆世界盃可謂百花齊放，有唔少精彩時刻，呢一刻小弟仍處於不捨之際，希望憑藉出文紀念一下呢個歷史性嘅盛事。

🇳🇿紐西蘭世界盃決賽周首勝
2023年7月20日，係紐西蘭嘅大日子。一來自己國家主辦嘅世界盃揭幕戰終於開幕，二來紐西蘭女足喺主場球迷見證下迎來自己喺世界盃決賽周，史上第一場勝利，憑著漢娜韋堅遜 (Hannah Wilkinson) 入波擊敗曾經嘅女足強國挪威。
🇯🇵日本短頭髮組合發威大炒西班牙
今屆神射手屬於攻入五球嘅宮澤日向，啡色短頭髮。佢同同樣係短頭髮嘅前線拍檔植木理子、猶本光聯手，多次打穿西班牙防線。日本反擊極快而銳利，上半場就領先三球。下半場另一位短頭髮前鋒田中美南後備上陣，禁區大位一撥一射彎入遠處網仔，令日本最終送夠四隻光蛋俾西班牙。

🇳🇬超霸鷹尼日利亞成黑馬
世界排名40，喺32隊參與嘅決賽周之中，相信尼日利亞最令人驚喜。分組賽同奧運女足金牌加拿大平分秋色，然後面對主場嘅澳洲先落後之下反勝，盡顯體力同心理上嘅韌性。

十六強對英格蘭，超霸鷹女將令雌獅們吃盡苦頭，令分組賽時順風順水嘅羅倫占士（Lauren James）踢得辛苦，繼而衝動踩踏阿露絲(Michelle Alozie)被罰紅牌出場。只可惜，互射十二碼向來無情，隨著姬利 (Chloe Kelly)一記比上季男子英超任何入球球速都要快嘅射門，尼日利亞無法再邁進一步。
經典一戰：🇸🇪瑞典對🇺🇲美國
十六強最強戲碼，連奪兩屆冠軍嘅美國隊，對後來成為四屆季軍嘅瑞典。美國重拾分組賽未見嘅王者風範，狂轟濫炸但久攻不下。瑞典門將梅素域(Zecira Musovic)表現神勇,令球隊捱到十二碼階段，最後一輪靴迪(Lina Hurtig)一射，美國門將妮雅(Alyssa Naeher)撲到但皮球仍飄向球門，妮雅再拍出皮球，眼見戰火延續之時，門線技術系統顯示皮球啱啱好入曬白界，係肉眼完全分辨唔到嘅距離！

🇺🇸韋冰露告別球壇
呢場係美國兩屆冠軍隊長「冰姐」，38歲嘅韋冰露(Megan Rapinoe)球員生涯最後一戰，十二碼炒飛機係佢國家隊時代最後一腳，儘管抱憾告別，但無阻佢成為足球史上偉大嘅傳奇。