西甲遊學見聞｜目標與推廣：千方百計追趕英超 精選

感謝都會大學以及LaLiga business school安排海外沉浸課程，小弟好榮幸能夠到西甲商學院沉浸喺西甲嘅環境，吸收足球，以至經營運動生意嘅養份。👀🇪🇸⚽️
旅程當中，有唔少內容值得分享，有資訊、有知識、亦有球場tour。香港時間7月23日早上11點，小弟YouTube頻道《里基夫 LeeKeith Talking》將會上載「帶你遊歷西班牙球場系列」第一條影片！而以下文字將分享關於西甲嘅目標同推廣。


西甲商學院嘅課堂，包含商業管理唔同部分。小弟從中了解到，西甲嘗試用千方百計，希望達到一系列嘅目標 (包括追過英超成為世一聯賽)。當中有唔少部分值得分享：

🇪🇸⚽️🧠
西甲喺2016年開始國際化，將佢哋嘅網絡分佈到84個國家，隨歐洲之外，亦覆蓋亞洲、非洲、北美洲、南美洲、大洋洲。

西甲深知難以喺英語國家或者地區，同英超對碰並爭奪觀眾，所以更著眼於其他地方。佢哋希望喺各個西班牙文地區中，成為本土聯賽以外最多人關注嘅，甚至係最受關注嘅比賽，佢哋亦嘗試喺亞洲地區如印度、泰國等增加推廣。

講到推廣，不得不提數位行銷。西甲數位行銷部門有超過30人，負責提供內容俾唔同地區。
值得一提嘅係，可能我哋會見到同一畫面，但廣告內容唔同。例如同一張球員加廣告版嘅相／片段，喺唔同地區版本中，球員背後嘅廣告牌，所顯示嘅品牌係唔同嘅。咁做係希望更加有效對應贊助商嘅目標地區，令宣傳更加精準。

另外，西甲有個計劃，名為 LaLiga experience, 每年會邀請一批 "Influencer" 體驗球場內外唔同部分，例如同球員互動、訪問、睇比賽、參與西甲有關嘅發布會…甚至喺西班牙嘅城市體驗生活，並製作內容。香港資深傳媒人伍家謙先生曾受邀請到訪貝迪斯。

小弟自己遠遠未到 “Influencer" 級數，但都略盡綿力製作內容，分享可遇不可求嘅所見所聞。小弟嘅YouTube頻道《里基夫 LeeKeith Talking》，「帶你遊歷西班牙球場系列」將有一連幾段影片，敬請期待！講到呢度，再次感謝都會大學以及LaLiga business school, 冇佢哋就冇呢啲內容。