年輕時如遊戲般屈機 於球會同國家隊皆有壯舉 「齊天大聖」巴爾功成身退 精選

屈機嘅速度同爆發力、狙擊槍般嘅遠射，巴爾年輕時嘅片段，足以帶嚟視覺上嘅衝擊，誇張程度接近球王級別。
出色嘅發揮，加上巴爾面型似足孫悟空，令到講中文嘅球迷都叫佢做「齊天大聖」。
大聖過關斬將嘅入波，過程往往簡單粗暴，好似打FIFA咁，「蠻橫無理」咁變速、變向。最經典嘅，相信係當年大聖自己傳俾3秒後嘅自己。當時佢推右走左途中，兜大外線硬爆馬克巴查，再攞波食返身位，繼而射入。一整套動作似乎得巴爾做到。
可惜嘅係，巴爾喺生涯中後期，傷患變得頻繁，高峰期亦變得有限，如今33歲便高掛球靴。不過，喺相對短嘅高峰期同球員生涯中，大聖已獲獎無數，包括5次歐聯冠軍、3次西甲冠軍…其中14年嘅飛頂同18年嘅倒掛金鈎，兩次令皇馬喺歐聯決賽中再度領先。

國家隊方面，巴爾曾助威爾斯打入16年歐國盃四強。幾年後，失去屈速能力嘅巴爾，就以更加成熟嘅踢法同面貌，帶領威爾斯再創佳績，殺入歐國盃八強，上年更助國家隊相隔64年再次打入世界盃決賽周。

最後，感謝巴爾，希望大聖功成身退後，好好享受退下來嘅日子，盡情打高爾夫球。⛳