「球王追夢隊」功臣逐個講-前線篇：阿珍天使 精選

「球王追夢隊」系列，今篇要講嘅係天使！美斯身邊嘅天使！阿根廷人嘅天使！我哋廣大球迷嘅天使！
🇦🇷🏆迪馬利亞
2008年奥運決賽，以一記笠射入波，助阿根廷擊敗尼日利亞贏得金牌。

2021年美洲盃決賽，以一記笠射入波，助阿根廷擊敗巴西，贏得28年嚟第一個大國腳錦標。

2022年歐美超級盃，以一記笠射入波，助阿根廷擊敗意大利，贏得殊榮。

2022年世界盃，迪馬利亞喺分組賽未能表現出佢最佳水準，淘汰賽退居後備。佢一度出現肌肉問題，狀態其實唔穩定。

決賽之前，還記得正選名單出爐後，普遍唔太睇好迪馬利亞回歸正選。不過，冇人估到佢踢嘅位置係左翼，而且充分發揮級數，無負教練團隊嘅信任。迪馬利亞幾番突破對方右路嘅觀迪同丹比利，23分鐘單人匹馬扭入禁區，再搏到十二碼令阿珍領先。其後一次反擊，佢從左路奔走到小禁區左角後兩碼，射破羅利斯十指關建功。
"Form is temporary, Class is Permanent."

呢句說話正正能形容迪馬利亞。雖然已經34歲，經過年月洗禮同消耗，難以一如年輕時，長時間保持最佳水準，但迪馬利亞仍然能夠，喺球壇最頂尖嘅舞台閃閃發光，發揮關鍵嘅影響力，並繼續作為阿珍嘅天使。