「球王追夢隊」功臣逐個講-前線篇 : 衝鋒兩子

loading

「球王追夢隊」系列,早前講過後防同中場嘅功臣。今篇輪到進攻球員,先講兩位衝鋒陷陣嘅主力。

🇦🇷🏆祖利安艾華利斯
自小係美斯嘅球迷,童年時與偶像合照,長大後與球王並肩作戰,一同圓夢。原本唔係正選嘅佢,喺第二場分組賽後備入替,不斷走動為隊友拉扯空間。其後嘅比賽,祖利安成為正選,喺前場不斷走動、壓迫同衝擊防線,形容佢係拼命三郎絕不為過。面對澳洲,佢憑前場壓迫入波。面對克羅地亞,佢嘅衝擊搏到對方門將利華高域犯規,令球隊得到12碼而領先,其後長驅直進,連闖幾關轟入拉開紀錄嘅入球。

唔止搏命,艾華利斯竄擾對方防線嘅能力,令人諗起前輩阿古路。分組賽面對波蘭,中路攻勢滲入禁區,祖利安小泛圍內一控一射,皮球直飛死角,可見功架。

面對克羅地亞時,下半場祖利安意會到美斯玩弄對方中堅加維度之後嘅動向,並接應傳中射入,睇嚟佢同美斯嘅默契亦不下於阿古路。

🇦🇷🏆拿達路馬天尼斯
今屆表現未盡人意,尤其喺把握機會方面。八強之前,拿達路嘅經理人指出,佢因足踝有傷而影響發揮。

雖然未能以最佳狀態出戰世界盃,但拿達路仍有一定嘅影響力。八強面對荷蘭,喺互射十二碼階段射入最關鍵嘅第五球,將阿珍送入四強。決賽面對法國,加時階段祖利安艾華利斯搏盡力竭後,拿達路後備入替,令球隊得以牽制對手。阿根廷再度領先嘅入球,亦係佢衝擊防線,突破越位攻門,而間接助攻美斯用右腳射入。

留言


請按此登錄後留言。未成為會員? 立即註冊
    快捷鍵:←
    快捷鍵:→