「球王追夢隊」功臣系列，今篇輪到中場，先講比較靠近邊線嘅兩位。
🇦🇷🏆麥亞里士打
上年美洲盃過後，麥亞里士打入選阿根廷國家隊，並漸漸得到機會。今屆世界盃原本並非正選嘅佢，喺分組賽生死戰面對墨西哥嘅表現，得到教練團隊信任。
麥亞里士打樣貌同美斯有幾分相似，技術亦然，懂得利用假身、假腳、身位等唔同方法保護皮球兼擺脫對手。今屆佢喺攞波轉身、護波同引球向前方面幫輕美斯唔少。就如其效力嘅白禮頓領隊迪沙比所言：「美斯同麥亞里士打講緊同一種足球語言，美斯明白 Alexis (麥亞里士打) 有幾高質。美斯好多時會望向 Alexis ，而佢哋之間有好多互傳互動。」
你可能會話迪沙比：「幫口抬價啫」，但事實上美斯又幾欣賞麥亞里士打，喺面對波蘭賽後，直情送咗個全場最佳球員獎俾佢。
🇦🇷🏆迪保羅
比起右閘摩連拿，迪保羅早一季由烏甸尼斯轉投馬體會。麥亞里士打喺世界盃決賽助攻迪馬利亞入波，而迪保羅就係上年美洲盃決賽助攻天使一箭定江山嘅功臣。
迪保羅亦被稱為美斯嘅保鑣，除咗時時守喺球王附近，佢亦包辦各種粗重工作，掃蕩、攔截、守轉攻…等工作時時做足，亦不時喺禁區頂偏右創造機會。中場嚟講，迪保羅幾乎要乜有乜。
迪保羅場場搏盡，前中後場都有佢身影，亦勤於喺球證同對手面前為隊友出頭。誓要為美斯贏冠軍嘅決心，喺迪保羅身上充份顯現，佢滿懷熱血嘅火氣，足以帶動兄弟們嘅士氣。
⭐⭐⭐阿珍功臣系列陸續有來🇦🇷
請按此登錄後留言。未成為會員? 立即註冊