阿珍贏世界盃，美斯正式登基，除因為球王嘅神級發揮，亦歸功於同佢相輔相成嘅隊友。首先要講嘅，係後防中路嘅四條硬漢。
🇦🇷🏆伊美利安奴馬天尼斯
首先不得不提，就係神龍伊美利安奴馬天尼斯。自細遠赴英國打滾十幾年 (其中不斷被外借)，終於喺前年漸露頭角。途中磨練出嚟嘅大心臟，令佢第一次踢世界盃，三番四次挺身而出，喺關鍵時刻或危難之中拯救球隊，包括兩次互射十二碼撲走其中三球。最重要，最經典嘅係，加時臨尾冷靜應對對方單刀，以大字型動作封走高路姆亞尼勁射，堪稱足球史上重要撲救。
🇦🇷🏆奧達文迪
美斯除咗迪馬利亞外，隊中另一位老拍檔，就要數到奧達文迪。佢以前喺曼城表現唔算突出，甚至有時「爆炸」，不過今年，呢位老將喺阿根廷表現就穩定得多。34歲，場場踢足，去到決賽仍能保持強勁嘅彈跳力同上前搶截嘅速率，值得掌聲👏。
🇦🇷🏆基斯頓羅美路
奧達文迪身旁嘅好拍檔，基斯頓羅美路都係一條硬漢，相信喺阿特蘭大同熱刺嘅時間，跟隨高強度嘅踢法，而練就一副好身手。羅美路覆蓋泛圍大之餘，搶波攔截落腳準，適時上前掃蕩埋一份，得以令阿珍保持控制局面。
🇦🇷🏆利辛度馬天尼斯
同美斯一樣，利辛度馬天尼斯從紐維爾舊生隊長大。近年喺阿積士備受矚目，今季去到強度最高嘅英超，隨即令曼聯不穩嘅防線脫胎換骨。呢位「地面屠夫」唔止硬淨而路數好，佢嘅激情足以振奮士氣，令球隊受壓時韌力加倍。今屆雖然唔係場場正選，但利辛度一出到嚟，表現都非常穩定。
阿珍球員吹奏陸續有嚟……😆
請按此登錄後留言。未成為會員? 立即註冊