世界盃禁忌多多丨唔俾著比堅尼同避彈衣 ? 唔俾帶廁紙同尿袋 ?

大馬歌手黃明志最近喺YouTube 上載一條關於世界盃嘅影片。當時佢去到主辦國卡塔爾拍MV，順道遊覽拍Vlog，亦經過世界盃嘅球場。
治途可見，主辦城市多哈裡面，大部分建築物仍然起緊 (當時離開幕日子仲有大概兩個月)，希望最終唔好因為趕工而造成安全問題。

黃明志去到盧塞爾球場外，發現一塊告示版，羅列咗一大堆被禁止嘅行為，小弟認為都幾值得攞出嚟講吓。

唔俾放火同炸彈、唔俾吸大麻、唔俾賭博、唔俾玩滑板車…都正常嘅 (雖然有啲唔洗列出嚟😂)。

不過有啲規則，或多或少會令世界盃嘅氣氛減弱，例如：
❌唔俾打鑼鼓
❌唔俾著比堅尼冇得打鑼鼓估計問題唔大。冇咗著比堅尼嘅性感美女，對好多人而言，盛事氣氛難免被打折扣。
有啲規則係甚至會令生活受阻，如：
❌唔俾帶廁紙
❌唔俾帶叉電器
唔俾帶廁紙？係咪因為驚兩年前，RB萊比錫球迷集體喺熱刺主場掟厠紙嘅情況重現？唔俾帶叉電器？？等你專注場波，唔篤咁多手機？

至於
❌唔俾著避彈衣
Whattt???? 🤣🤣

喺卡塔爾搞世界盃，問題處處，不得不提關於對待勞工嘅部份尤其嚴重。另外當地嘅基建、文化，都似乎未真正準備好迎接大量來自世界各地嘅遊客。

雖說入鄉隨俗，但啱啱提到一啲關乎日常需要嘅禁令，希望當地執法部門酌情處理啦。最後，小弟亦希望到時嘅世界盃，能安全順利咁舉行。

希望大家多多支持！撳多幾個掣，俾多幾個鼓勵！(例如「訂閱」掣，同埋follow IG: @football_era_talking 觀看更多唔同嘅短文/資訊/睇波即時story分享)