利迷隨筆丨干拿迪回歸正選改變對決形勢 利物浦後發制人破拿玻里金身 精選

可以連續輸俾諾定咸森林，同列斯聯兩支護級球隊，亦能夠打破紐卡素、曼城同拿玻里嘅不敗金身。利物浦話俾你知，波，係一場場咁睇嘅！琴晚歐聯喺晏菲路球場以兩球淨勝拿玻里，最終爭唔到小組首名，都爭到啖氣，仲有高普個人喺歐聯第100場勝利。
今場利記有干拿迪回歸偏右中堅正選位置，助球隊今次再對拿玻里，形勢相比首循環大有改善。

步大力雄嘅干拿迪，能幫助阿諾守住右路，上季大戰如是，今場如是。主攻陣地戰時，有佢嘅覆蓋率之下，球隊更能阻止對方反擊，並控制節奏，而身前嘅三位中場企位可以推得更前，其中堤亞高同米拿可以更多同邊路互動，球隊回歸變陣前嘅進攻踢法。
今場值得留意嘅，仲有鐘斯。鐘斯今場擔任左翼。本身較少踢呢個位嘅佢，配搭並非常規正選嘅左閘森美卡斯，組織上唔能夠期望太多。不過鐘斯勝在效率高，壓迫、幫波等動作做足，足以帶來牽制力。

雖然球隊能將隊形壓前，但防守方法上，並非如首循環般長時間向前壓迫。利記今場有唔少時間收縮防守 (截至70分鐘拿玻里控球率較高)，令今季冒起嘅拿玻里「字母哥」基化史基尼亞同奥斯文發揮衝擊力嘅空間大減。

73分鐘，高普安排紐尼斯入替鐘斯。調動之後，球隊進攻更加銳利，有助壓住對手。由紐尼斯入場至比賽結束，控球比率為六四之比，同一時段嘅射門次數係7-4。利記更多時間喺壓前場，機會自然多，最終分別喺85同97分鐘，雲迪克兩次頭槌攻門都被對方門將美列撲出，但分別俾到沙拿同紐尼斯「執雞」射入，助利記最終成功後發制人，以兩球淨勝拿玻里。比起首名同贏波獎金，更加重要嘅係信心，希望利記如沙拿所講：「打敗其中一支最出色嘅球隊，感覺係最好嘅。我哋必須要繼續落去，呢場勝仗會俾到我哋喺盃賽同聯賽嘅信心。」

希望大家多多支持！撳多幾個掣，俾多幾個鼓勵！(例如「訂閱」掣，同埋follow IG: @football_era_talking 觀看更多唔同嘅短文/資訊/睇波即時story分享)