英超丨賽後分析 : 曼聯注入概念方面已有進展 熱刺衝擊人手短缺 精選

英超魔刺大戰，曼聯兩球淨勝熱刺🔥
干地麾下嘅熱刺，面對體能同前線傷兵問題，作客奥脫福以352陣型，用穩守突擊嘅取態作戰。
曼聯前場壓迫/遮線到位，令熱刺難以將球運送上前。熱刺往往需要前線哈利簡尼或老孫回後幫助運送，令向前衝擊嘅人手更加短缺，難以打快攻/反擊。

熱刺大部分時間將隊形收後，曼聯面對對方三中堅三防中嘅企位，用球有足夠耐性，亦能從後以左右邊轉移尋找運送上前嘅空間，而且過程係穩定嘅，能夠控制節奏，同一開季嘅表現已有相當大對比。
進攻方面，曼聯前線人手足夠，三人具有效率，拉舒福特同辛祖勤於鋪橋搭路，安東尼引球前進亦具有牽制力，加上左右轉邊嘅拉扯，球隊得以製造插入禁區/遠射嘅空間，製造拉舒福特半單刀拗腰抽射 (要讚羅利斯反應同落地伸手快)、卡斯米路遠射等攻門機會。

喺相近嘅控球率之下，曼聯壓過半場 (己方Final third 活動比例：曼聯23% - 熱刺36%) 同射門次數(28-9）都大幅領先於熱刺。曼聯攻防更有效，令熱刺更多受壓而消耗更多體力，亦令曼聯喺優勢之下，運氣降臨嘅機會比對方更高。費特同般奴分別帶有幸運成份嘅入球，熱刺今場難以做到。
熱刺落後兩球之下，去到82分鐘先作出調動，反而坦克首先以麥湯文尼入替安東尼。曼聯受壓時間唔長，最終順利再贏一場 Big six 對決。

曼聯贏得大戰，眾將功不可沒，除剛才所提到前線嘅表現，卡斯米路踢出加盟後最好嘅表現，費特充分發揮對抗上嘅長處，般奴嘅狀態回復唔少，兩閘達洛同梳爾用波用防守發揮穩定，兩位中堅華拉尼同馬天尼斯，面對哈利簡尼同老孫都招呼周到。

美中不足嘅係，大哥C朗擅自提早離場，球隊周未面對車路士嘅大戰，大家唔會見到佢嘅身影，佢亦暫時要獨自操練。
對於C朗嘅行為，唔少人已對其口誅筆伐，老實而言真係撐唔落。
但從C朗嘅角度，小弟表示同情，原因如下：
💔面對同一個對手，上次連中三元，今次未能正選出場
💔球隊眾將都踢得好，只有佢自己狀態低迷
💔最大鑊嘅係，佢自己嘅處境，與佢所期望嘅境況漸行漸遠，呢個係我哋難以身同感受嘅。

最後，恭喜曼聯喺注入控球概念方面，已有明顯進展，今場勝利定會令眾將信心再次提升。