勢破紀錄? 夏蘭特入球率已領先當年創造紀錄嘅美斯 但關鍵在後頭 精選

曼城神鋒夏蘭特繼上周曼市打吡連中三元後，琴晚去到歐聯延續強勢，再入兩球。
22歲之時，夏蘭特歐聯入球數字(32球)已超越多位昔日嘅頂級前鋒，包括雲佩斯、基斯普、蘇亞雷斯、李華度、希古恩、朗拿度、朗拿甸奴、費蘭度托利斯、朗尼…等等。

強勁嘅身體質素，加上一流嘅埋門意識同技術，配合迪布尼、簡些路、貝拿度施華等人才供應機會，令夏蘭特幾乎無人能擋。

今季布歐嘅表現，誇張程度令人回想昔日C朗同美斯年輕時嘅風光。論入球，美斯2011/12球季嘅表現最為驚人，當季入咗73球，若計2012年單年記錄，就係91球！

夏蘭特或可以以此為目標。此時此刻，佢喺英超出8場入14球，歐聯踢3場入5球。美斯喺2011/12球季，踢8場西甲入10球，踢3場歐聯後只入兩球。同階段嚟講，布歐有過之而無不及。不過值得留意嘅係，美斯當年喺下半季先係最瘋狂，歐聯16強面對利華古遜，兩回合入6球（當中喺次回合五福臨門😮😮)，兩回合之間，仲有場面對華倫西亞嘅聯賽，美斯上演大四喜！由當年2日19日舉行嘅第24輪西甲聯賽開始到煞科日，美球踢咗15場入27球，令最終佢以50球成績成為西甲神射手。
假如夏蘭特能全季維持呢個效率，就絕對有可能破到美斯嘅紀錄。相信今季嘅曼城，喺各條戰線都有力打到最後階段，問題在於夏蘭特能否避免受傷，並且維持狀態。

大家覺得，布歐今季/今年，會唔會破美斯當季/當年嘅入球紀錄？

希望大家多多支持！撳多幾個掣，俾多幾個鼓勵！(例如「訂閱」掣，同埋follow IG: @football_era_talking 觀看更多唔同嘅短文/資訊/睇波即時story分享)